“Vest Hem” futbolchisi Deklan Raysning “Arsenal”ga o‘tishi ushbu yozdagi eng qimmat transfer bo‘lib turibdi. “Bolg‘achilar” 24 yoshli futbolchi uchun 116 million yevro va bonuslar oladi.
Rays — “kanonirlar” tarixidagi eng qimmat transfer. Angliyalik futbolchiga qadar 4 yil oldin “Lill”dan 80 million evaziga xarid qilingan Nikolya Pepe “Arsenal”ning eng qimmat transferi edi.
Shuningdek, Deklan futbol tarixidagi eng qimmat futbolchilar top-10 ligidan ham joy oldi. Quyida eng qimmat 10 futbolchi haqida so‘z boradi.
Qolgan futbolchilarda nima gap?
• Neymar 6 yil avval “Barselona”dan “PSJ” safiga o‘tgandi. Messi soyasidan ketib, boshqa bir jamoada porlab, “Oltin to‘p”ni qo‘lga kiritish istagida bo‘lgan braziliyalik futbolchi hamon ushbu sovrinni qo‘lga kirita olmadi. Parijliklarning yangi murabbiyi Luis Enrike hozircha futbolchiga ishonch bildirmoqda, biroq undan qat’iy intizom talab qilinadi. Neymar buni uddalay olarmikan?
• Kilian Mbappe nafaqat “PSJ”ning asosiy yulduzi, balki, boshog‘rig‘iga ham aylanib bo‘ldi. Shartnomani uzaytirmasligi borasidagi xabaridan so‘ng parijliklar unga turli xil tahdidlarni qo‘llamoqda. Parij klubi “Real” asosiy da’vogar bo‘lib turgan futbolchidan shartnomani uzaytirishni talab qilmoqda. “PSJ” Mbappeni tekinga qo‘yib yuborishni istamayapti.
• Filippe Koutinyo — “Barselona” tarixidagi eng omadsiz transferlardan biri. Braziliyalik futbolchi klubda Andres Inyestaning o‘rnini egallashi lozim edi, biroq na Valverde, na Kuman uni jamoa o‘yin tizimiga moslashtira olmagan. “Bavariya”ga ijaraga o‘tish ham Koutinyoga yordam bermagan. Hozirda “Aston Villa” futbolchisi bo‘lib turgan Filippening hamon ishlari o‘xshamayapti.
• Usmon Dembelening ham kataloniyaliklar safidagi faoliyati juda og‘ir boshlangan. Doimiy jarohatlardan so‘ng Xavi uning faoliyatiga qayta jon bag‘ishladi. Hozir u klubning eng asosiy futbolchilaridan biri, hattoki, yangi mavsum sardorlari ro‘yxatidan ham joy olgan. “Ko‘k-anorranglilar” futbolchi bilan shartnomani 2027-yilgacha uzaytirish borasida muzokaralar olib bormoqda.
• “Atletiko” Joau Feliks borasida adashgan ko‘rinadi. Portugaliyalik Grizmannga o‘rinbosar sifatida olib kelingandi, biroq u “matraschilar”ning asosiy tarkibidan joy ololmadi. “Chelsi”dagi faoliyati ham unga yordam bera olmadi. Joau “Atletiko”dan ketishni istamoqda. Yaqindagina “Barselona”ga o‘tish orzusi borligi haqida intervyu ham berdi. Lekin hozircha futbolchiga faqatgina “Aston Villa”dan qiziqish mavjud.
• Enso — Todd Boulining ommaviy xaridlari ramzidir. Argentinalikning “aristokratlar”dagi starti yomon kechmadi. Pochettino qo‘l ostida esa yanada ko‘proq qobiliyatini namoyish etishga imkon bo‘ladi. Buning uchun Ensoda vaqt ko‘p bo‘ladi: uning londonliklar bilan shartnomasi 2032-yilgacha mo‘ljallangan.
• Antuan Grizmann “Barselona”da o‘ynab keta olmadi va “Atletiko”ga qaytdi. Madridliklar safida yana o‘zining yuqori darajadagi o‘yinlarini namoyish etmoqda. Hatto, avvalgi 7-raqamini ham qaytarib oldi.
• Eng qimmat ingliz futbolchisi Jek Grilish hamon taxtda. “Manchester Siti” “Aston Villa”ga to‘lab bergan narxni hozircha hech qaysi klub yangilay olgani yo‘q. Dastlab, Jek Pep tizimiga kirishib keta olmaydi deb hisoblangandi, lekin ortda qolgan mavsum bu gap-so‘zlarga chek qo‘ydi.
• Krishtianu Ronalduning transferi “Yuventus”ni iqtisodiy inqirozga olib keldi. Portugaliyalik futbolchi maydonda muntazam gol urib turgan bo‘lsa-da, turinliklarning eng katta maqsadi bo‘lgan Chempionlar Ligasida zafar quchishga yordam bera olmagan.
Izoh (0)