Jizzax viloyatida 541 ta baliq noqonuniy ovlanib, tabiatga 178 million 530 ming so‘m zarar yetkazilgani aniqlandi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati.
Ma’lum qilinishicha, vazirlikning Аydar-Аrnasoy ko‘llar tizimi bo‘limi davlat inspektorlari hamda Jizzax viloyat prokuraturasi xodimlari hamkorligida nazorat reyd tadbiri o‘tkazilgan.
Reyd davomida Аydar-Аrnasoy ko‘llar tizimi, Аrnasoy bo‘limi hududida Toshkent viloyati, Chinoz tumani, “Oqoltin” MFYda yashovchi fuqaro T.B. noqonuniy baliq ovlagani aniqlangan. Uning mashinasidan ovlash taqiqlangan kichik o‘lchamdagi jami 541 ta (113,5 kilo) oqsila (sudak) baliqlari topilgan.
O‘rganish natijasida hayvonot dunyosiga jami 178 million 530 ming so‘m miqdorida zarar keltirilgani aniqlandi. Ayni paytda holat yuzasidan to‘plangan hujjatlar prokuratura organlariga taqdim etish uchun tayyorlanmoqda.
Ushbu hududda aprel oyida o‘tkazilgan reyd davomida elektr qarmoqlardan foydalangan holda noqonuniy baliq ovlayotganlar aniqlangandi. O‘shanda fuqarolardan biri xizmat vazifasini bajarayotgan xodimlarning qonuniy talablarini bajarmasdan, ularga faol qarshilik ko‘rsatib, noqonuniy ovlagan baliqlari va boshqa ashyoviy dalillarni yo‘q qilish maqsadida o‘zining Nexia-3 ni departament bo‘lim boshlig‘i ustiga haydab, uning hayoti va sog‘lig‘iga xavf tug‘dirish orqali tan jarohati yetkazgandi.
Izoh (0)