Жиззах вилоятида 541 та балиқ ноқонуний овланиб, табиатга 178 миллион 530 минг сўм зарар етказилгани аниқланди, деб хабар бермоқда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.
Маълум қилинишича, вазирликнинг Айдар-Арнасой кўллар тизими бўлими давлат инспекторлари ҳамда Жиззах вилоят прокуратураси ходимлари ҳамкорлигида назорат рейд тадбири ўтказилган.
Рейд давомида Айдар-Арнасой кўллар тизими, Арнасой бўлими ҳудудида Тошкент вилояти, Чиноз тумани, “Оқолтин” МФЙда яшовчи фуқаро Т.Б. ноқонуний балиқ овлагани аниқланган. Унинг машинасидан овлаш тақиқланган кичик ўлчамдаги жами 541 та (113,5 кило) оқсила (судак) балиқлари топилган.
Ўрганиш натижасида ҳайвонот дунёсига жами 178 миллион 530 минг сўм миқдорида зарар келтирилгани аниқланди. Айни пайтда ҳолат юзасидан тўпланган ҳужжатлар прокуратура органларига тақдим этиш учун тайёрланмоқда.
Ушбу ҳудудда апрель ойида ўтказилган рейд давомида электр қармоқлардан фойдаланган ҳолда ноқонуний балиқ овлаётганлар аниқланганди. Ўшанда фуқаролардан бири хизмат вазифасини бажараётган ходимларнинг қонуний талабларини бажармасдан, уларга фаол қаршилик кўрсатиб, ноқонуний овлаган балиқлари ва бошқа ашёвий далилларни йўқ қилиш мақсадида ўзининг Nexia-3 ни департамент бўлим бошлиғи устига ҳайдаб, унинг ҳаёти ва соғлиғига хавф туғдириш орқали тан жароҳати етказганди.
Изоҳ (0)