Instagram ijtimoiy tarmog‘ida qariyb 1 million obunachiga ega bo‘lgan bloger “Asad-algo” vafot etgandi. Toshkent shahar IIBB holat yuzasidan jinoyat ishi qo‘zg‘atilganini ma’lum qildi.
Qayd etilishicha, 19-iyul kuni Respublika shoshilinch tez tibbiy yordam ko‘rsatish markaziga 2002-yilda tug‘ilgan Asadbek Arzikulov (“Asad-algo”) “bosh miya yopiq jarohati, bosh miya lat yeyishi, bosh subdural gematomasi, bo‘yin sohasi qontalashi, ikkala tizzasi va ikkala tirsagida ko‘kargan jarohatlari” bilan murojaat qilgan. Shifokorlar tomonidan bu holat haqida zudlik bilan IIOga xabar berilgan.
O‘rganishlar jarayonida aniqlanishicha, 16-iyul kuni Mirzo Ulug‘bek tumanidagi bog‘lardan birida 1997-yilda tug‘ilgan Abdulaziz I. tanishi Asadbek A. bilan o‘rtasida o‘zaro kelishmovchilik sababli janjal kelib chiqqan. Natijada Asadbek A. tan jarohati olgan. So‘ng ular o‘zaro kelishib olgani sababli tarqalishgan.
Mazkur holat yuzasidan Asadbek IIOga, shuningdek tibbiyot muassasasiga murojaat qilmagan.
19-iyul kuni uning tobi qochgani sababli shifoxonaga olib borilgan va uning bosh qismida jarrohlik amaliyoti o‘tkazilgan. Biroq shifokorlarning saʼy-harakatlariga qaramasdan, vafot etgan.
Mazkur holat yuzasidan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lishi) bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)