Jizzax viloyatida davlat xizmatchisi faoliyatiga qarshilik ko‘rsatib, unga tan jarohati yetkazgan brakonyerga nisbatan jinoyat ishi qo‘zg‘atildi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Aydar-Arnasoy ko‘llar tizimi resurslardan foydalanish sohasida iqtisodiy huquqbuzarliklarga qarshi kurashish bo‘limi tomonidan Tabiat resurslari vazirligining Aydar-Arnasoy ko‘llar tizimi bo‘limi xodimlari bilan hamkorlikda tungi vaqtda tezkor tadbir o‘tkazildi. Tadbirda Arnasoy tumanida yashovchi K.S. va boshqalar elektr qarmoqlaridan foydalangan holda noqonuniy baliq ovlayotgani aniqlangan.
K.S. xizmat vazifasini bajarayotgan xodimlarning qonuniy talablarini bajarmasdan, ularga faol qarshilik ko‘rsatib, noqonuniy ovlagan baliqlari va boshqa ashyoviy dalillarni yo‘q qilish maqsadida o‘zining Nexia-3 rusumli avtotransport vositasini departament bo‘lim boshlig‘i P.O.ning ustiga haydab, uning hayoti va sog‘lig‘iga xavf tug‘dirish orqali tan jarohati yetkazgan.
Mazkur holat yuzasidan Forish tuman prokuraturasi tomonidan Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.
O‘zbekistonda baliq ovlashda brakonyerlikka qarshi nazorat
Bosh prokuratura “O‘zbekiston Respublikasi tabiiy suv havzalarida baliq ovlash qoidalarini tasdiqlash to‘g‘risida”gi Vazirlar Mahkamasi qarori loyihasini muhokamaga qo‘ygan.
Hujjat bilan O‘zbekiston tabiiy suv havzalarida baliq ovlash qoidalari ilovaga muvofiq tasdiqlanib, ushbu qaror 2023-yil 1-iyuldan boshlab amalga kiritilishi kutilmoqda.
Baliqlarni tutish uchun to‘lovlar miqdoriga ko‘ra, noyob va yo‘q bo‘lib ketish xavfi ostidagi turlar, O‘zbekiston “Qizil kitobi”ga kiritilgan baliqlarni ilmiy, tibbiy maqsadlarda ovlash uchun BHMga 3 barobari miqdorida to‘lovni amalga oshirish lozim bo‘ladi. Xorijiy fuqarolar va yuridik shaxslar uchun esa mazkur to‘lov (1 donasi uchun) 500 dollarni tashkil etadi.
Izoh (0)