UzAutoMotors iyul oyi boshida Asakadagi zavodda modernizatsiya boshlangani sabab avtomobil ishlab chiqarish vaqtincha to‘xtatilishini eʼlon qilgandi. Keyinroq kompaniya vakili zavod faoliyati 17-iyul (dushanba) kunidan boshlanishini aytgan.
Asakadagi avtomobil ishlab chiqarish zavodi belgilangan muddatda (17-iyul kuni) ish boshlagan. Bu haqda kompaniya vakili “Daryo”ga maʼlum qildi.
UzAutoMotors bayonotida modernizatsiyadan so‘ng avtomobil ishlab chiqarish quvvatlari oshirilishi qayd etilgandi. Xususan, Chevrolet Cobalt avtomobilini ishlab chiqarish hajmi ortishi taʼkidlangan.
“Yig‘uv sexining ikkita liniyasida ham ishlab chiqarish tezligini oshirish imkonini beruvchi keng ko‘lamli ishlar amalga oshirildi. Yaʼni birinchi liniyada ishlab chiqarish tezligi 35 JPHga (soatiga avtomobillar), ikkinchi liniyada bu ko‘rsatkichni 30 JPHga yetkazish imkoniyati yaratildi. Bu o‘z navbatida, barcha avtomobil modellarining yillik ishlab chiqarish hajmini oshiradi. Ikkinchi liniyaning modernizatsiya qilinishi Chevrolet Cobalt avtomobilining yillik ishlab chiqarish hajmini qo‘shimcha 30 ming donaga oshirish imkonini berdi”, — deya maʼlum qildi kompaniya vakili.
Qo‘shimcha qilinishicha, endilikda Cobalt avtomobili eng ko‘p miqdorda, undan keyingi o‘rinda Damas ishlab chiqariladi.
Avvalroq Cobalt avtomobili yoz fasli oxirigacha qayta sotuvga chiqarilishi kutilayotgani xabar qilingandi.
Eslatib o‘tamiz, joriy yilning yanvar—may oylarida eng ko‘p ishlab chiqarilgan avtomobil Cobalt (39 ming 264 dona) bo‘lgan. Keyingi o‘rinlarda Lacetti (27 ming 961 dona) va Damas (26 ming 815 dona) ishlab chiqarilgan. Biroq mazkur avtomobillar sotuvda mavjud emas. UzAuto Motors 2022-yil 17-dekabrda Cobalt, Lacetti, Damas avtomobillari sotuvini to‘xtatgan. Kompaniya 2023-yildan Spark va Nexia o‘rniga Tracker va Onix ishlab chiqarishini maʼlum qilgan.
Izoh (0)