Chevrolet Cobalt avtomobili yoz fasli oxirigacha qayta sotuvga chiqarilishi mumkin. Bu haqda “Daryo”ning UzAutoMotors‘dagi manbasi maʼlum qildi.
O‘zbekistonda Cobalt avtomobili sotuvi uchun shartnomalar tuzish 2022-yil dekabrda to‘xtatilgan. Biroq mazkur avtomobilni ishlab chiqarish joriy yilning yanvar–may oylarida ham davom etgan. Statistika agentligi hisobotiga qaraganda, o‘tgan 6 oy ichida eng ko‘p ishlab chiqarilgan avtomobil Cobalt bo‘lgan — qariyb 39 ming 264 dona.
Yaqinda kompaniya vakili ishlab chiqarilayotgan avtomobillar qayerga “ketayotgani” to‘g‘risida “Daryo”ga maʼlumot bergandi.
“Ishlab chiqarilayotgan avtomobillar eski tuzilgan shartnomalar bo‘yicha yetkazib berilmoqda. Navbatlar kamaygach, sotuv shartnomalari qayta tiklanadi”, — degan u.
UzAutoMotors 1-iyul kuni navbatdagi bayonoti bilan chiqib, Asakadagi zavodda modernizatsiya ishlari boshlangani sababli avtomobil ishlab chiqarish vaqtincha to‘xtatilishini maʼlum qildi. Bu orqali ommaga avtomobil ishlab chiqarish quvvatlari oshirilishi bildirildi. Xususan, kompaniya mazkur modernizatsiya jarayonidan keyin Chevrolet Cobalt‘ni yiliga doimgidan 30 ming dona ko‘proq ishlab chiqarishga vaʼda berdi.
“Daryo” muxbiri kompaniyadagi manbasi bilan bog‘lanib, Cobalt sotuvi qachon boshlanishi haqida so‘radi. Manbaning maʼlum qilishicha, avgust oyi yakunida Cobalt avtomobili sotuvi boshlanishi mumkin.
Hozircha zavoddagi modernizatsiya jarayonlari qancha vaqt davom etishi, avtomobil ishlab chiqarish qachondan boshlanishi nomaʼlum. Shunisi aniqki, Asaka zavodidagi taʼmirlash va yangilash ishlari avtomobillar narxiga taʼsir qilmaydi.
Izoh (0)