UzAutoMotors июль ойи бошида Асакадаги заводда модернизация бошлангани сабаб автомобиль ишлаб чиқариш вақтинча тўхтатилишини эълон қилганди. Кейинроқ компания вакили завод фаолияти 17 июль (душанба) кунидан бошланишини айтган.
Асакадаги автомобиль ишлаб чиқариш заводи белгиланган муддатда (17 июль куни) иш бошлаган. Бу ҳақда компания вакили “Дарё”га маълум қилди.
UzAutoMotors баёнотида модернизациядан сўнг автомобиль ишлаб чиқариш қувватлари оширилиши қайд этилганди. Хусусан, Chevrolet Cobalt автомобилини ишлаб чиқариш ҳажми ортиши таъкидланган.
“Йиғув цехининг иккита линиясида ҳам ишлаб чиқариш тезлигини ошириш имконини берувчи кенг кўламли ишлар амалга оширилди. Яъни биринчи линияда ишлаб чиқариш тезлиги 35 JPHга (соатига автомобиллар), иккинчи линияда бу кўрсаткични 30 JPHга етказиш имконияти яратилди. Бу ўз навбатида, барча автомобиль моделларининг йиллик ишлаб чиқариш ҳажмини оширади. Иккинчи линиянинг модернизация қилиниши Chevrolet Cobalt автомобилининг йиллик ишлаб чиқариш ҳажмини қўшимча 30 минг донага ошириш имконини берди”, — дея маълум қилди компания вакили.
Қўшимча қилинишича, эндиликда Cobalt автомобили энг кўп миқдорда, ундан кейинги ўринда Damas ишлаб чиқарилади.
Аввалроқ Cobalt автомобили ёз фасли охиригача қайта сотувга чиқарилиши кутилаётгани хабар қилинганди.
Эслатиб ўтамиз, жорий йилнинг январь—май ойларида энг кўп ишлаб чиқарилган автомобиль Cobalt (39 минг 264 дона) бўлган. Кейинги ўринларда Lacetti (27 минг 961 дона) ва Damas (26 минг 815 дона) ишлаб чиқарилган. Бироқ мазкур автомобиллар сотувда мавжуд эмас. UzAuto Motors 2022 йил 17 декабрда Cobalt, Lacetti, Damas автомобиллари сотувини тўхтатган. Компания 2023 йилдан Spark ва Nexia ўрнига Tracker ва Onix ишлаб чиқаришини маълум қилган.
Изоҳ (0)