UzAuto Motors Қозоғистоннинг Костанай вилоятидаги “СariarkaAvtoProm” заводида Chevrolet Onix автомобилларини кичик узелли йиғишни йўлга қўйишни режалаштирмоқда. Бу ҳақда ҳукумат раҳбарлари ўринбосарлари даражасидаги мамлакатлар ишчи гуруҳи йиғилишида маълум қилинди.
Икки томонлама ҳужжатларда иқтисодиётнинг турли тармоқларида йирик лойиҳалар режалаштирилган. Хусусан, Қарағанда вилоятида Artel маиший техника ишлаб чиқаришни йўлга қўйиш лойиҳаси ўз вақтида амалга оширилмоқда.
Шу билан бирга, 2024 йилнинг биринчи чорагидан Костанай вилоятида Chevrolet Onix автомобилларини йиғишни йўлга қўйиш лойиҳаси ишлаб чиқилган. Бу бўйича шартномалар тузилиб, пайвандлаш, бўяш, йиғиш цехлари учун ускуналарни тайёрлаш ишлари олиб борилмоқда.
Костанайда Onix автомобилини йирик узелли йиғиш ишлари 2023 йил май ойида бошланган эди.
Кичик узелли йиғиш — бу автомобилнинг асосий турдаги бутловчи қисмлари ишлаб чиқарувчи томонидан етказиб берилиши ва маҳаллий заводда қатор технологик операциялар (пайвандлаш, бўяш, ичини жиҳозлаш) ёрдамида йиғилишидир.
UzAuto Motors май ойи бошида Chevrolet Onix ва Tracker автомобиллари сотувини тўхтатганди. Компания 2022 йилда ҳамёнбоп моделлардан Spark, Nexia, Cobalt ва Lacetti автомобиллари сотувини тўхтатиб, Onix ва Tracker учун шартномалар тузишни бошлаган. Бироқ 2023 йил май ойи бошидан нархи 207 миллион сўмлик Onix ва 211 миллион сўмлик Tracker сотуви тўхтаб қолган.
UzAutoMotors июль ойи бошида Асакадаги заводда модернизация ишлари олиб борилиши сабаб автомобиль ишлаб чиқариш вақтинча тўхтатилишини эълон қилганди. Компания вакилининг “Дарё”га маълум қилишича, заводда автомобиль ишлаб чиқариш 17 июль (душанба) кунидан бошланган.
Изоҳ (0)