Ёшлар сиёсати ва спорт вазирлиги 21 июнь—6 июль кунлари оралиғида “Ўзбекистон давлат спорт академияси фаолиятини ташкил қилиш чора-тадбирлари тўғрисида“ги президент қарори лойиҳаси жамоатчилик муҳокамасига қўйди. Ҳужжатга кўра, 2025 йилда Тошкент шаҳар Яшнобод туманидаги Олимпия шаҳарчасига янги Ўзбекистон давлат спорт академияси жойлаштирилади.
Қайд этилишича, Ёшлар сиёсати ва спорт вазирлиги ҳамда Олий таълим, фан ва инновациялар вазирлиги 2025 йил 1 январдан бошлаб Олий спорт маҳорати институти негизида Ўзбекистон давлат спорт академиясини ташкил этади. Жисмоний тарбия ва спорт илмий тадқиқотлар институти ушбу Спорт академияси ҳузурига ўтказилади.
Қуйидагилар Спорт академиясининг асосий вазифалари ва фаолияти йўналишлари этиб белгиланади:
- жисмоний тарбия ва спорт соҳасида замон талабларига жавоб берадиган кадрларни, Осиё ва параосиё, олимпия ва паралимпия ўйинларида, шунингдек, жаҳон кубоги ҳамда чемпионатларида натижа кўрсатадиган спортчиларни тайёрлаш;
- кадрларни тайёрлашда илғор таълим технологияларини ва хорижий тажрибаларни қўллаган ҳолда ўқув жараёнини ташкил қилиш;
- давлат ва нодавлат спорт ташкилотлари спорт базаларидаги ўқув машғулот йиғинларини таҳлил қилиш жараёнига профессор-ўқитувчилар ва талабаларни жалб этиш, машғулотларни ўтказишнинг илғор усулларини жорий этиш;
- юқори спорт натижаларига эришган таниқли спортчиларнинг жисмоний, техник, тактик ва психологик хусусиятларини таҳлил қилиш, замонавий спорт назарияси ва амалиёти, элита спортчиларни тайёрлаш, усуллари ва хусусиятларини ўрганиш;
- Республика, Осиё, Жаҳон чемпионатлари ва кубокларини ҳамда олимпия ва паралимпия ўйинларини мунтазам таҳлил қилиб бориш, элита спортчиларни тарбиялаш, ахлоқий тарбиялаш ва бошқариш, допинг назорати, халқаро мусобақалар таҳлил натижаларини тажрибада қўллаш;
- спортчи ва тренерлик фаолиятининг тадқиқот усуллари, замонавий спорт ютуқларидан фойдаланиш кўникмаларини шакллантиришга оид илмий-амалий тадқиқотларни амалга ошириш.
Спорт академияси юридик шахс мақомига эга бўлган олий таълим муассасаси ҳисобланади. Ўқув жараёни 2025/2026-ўқув йилидан бошланади.
Шу ва кейинги ўқув йилларида Спорт академиясига ўқишга қабул квоталари олий таълим муассасаларига ҳар йилги қабул квоталари белгиланган тартибда шакллантирилади.
Спорт академиясига талабаларни қабул қилиш параметрлари давлат буюртмаси сифатида ҳар бир спорт турининг хусусиятидан (вазн тоифаси, спортчилар сони, шу жумладан спортчи-аёллар сони, жамоавий спорт турлари бўйича тегишли спорт турида иштирок этадиган спортчилар сони ва бошқалар) келиб чиқиб, ҳудудларда иқтидорли ёшларни аниқлаш, танлаш ва саралаш (селексия) махсус спорт тизимини бошқариш платформасида шаклланган Олимпия ва Паралимпия спорт турларига тайёрлаш марказлари битирувчиларининг спорт натижалари асосида шакллантирилади. Шунингдек:
- Спорт академиясига талабаларни қабул қилиш шаффоф ва очиқ танлов асосида ўтказилади;
- Спорт академиясида ўқиш мослаштирилган ўқув режалари ва дастурлари асосида ташкил этилади;
- Спорт академияси битирувчиларига танланган спорт тури бўйича “тренер” мутахассислиги берилади;
- Спорт академияси битирувчиларига Ўзбекистон Республикасида олий таълим тўғрисидаги ҳужжат сифатида тан олинадиган давлат намунасидаги диплом берилади;
- Спорт академияси битирувчиларига тўғридан тўғри спорт бўйича ҳакам ҳамда иккинчи тоифали тренер малака тоифасини белгиловчи гувоҳнома берилади.
Изоҳ (0)