Ixtisoslashtirilgan ta’lim muassasalari agentligi, Prezident maktablariga kirish imtihonlarida Kembrij mutaxassislari bilan hamkorlik to‘xtatilgani haqidagi tasdiqlanmagan axborotga javoban, Cambridge University Press&Assessment tashkilotining ta’lim yo‘nalishi bo‘yicha bosh maslahatchisi Stiv King tomonidan yo‘llangan rasmiy videoizohni taqdim etdi.
Stiv King uning tashkiloti O‘zbekistondagi prezident maktablariga qabul imtihonlarida 2019-yildan buyon ishtirok etayotganini aytib, bu hamkorlik “uzoq yillar davom etishi”ga ishonch bildirdi.
“O‘zbekiston Prezident maktablariga qabul imtihonlari haqida gapirib o‘tsam, 2019-yildan buyon va bu yil ham tashkilotimiz O‘zbekiston Respublikasi Ixtisoslashtirilgan ta’lim muassasalari agentligi bilan birgalikda ishlab keladi hamda imtihon savollarini tayyorlash va o‘quvchilarni saralashda, natijalarni e’lon qilishda ishtirok etadi.
Har yili O‘zbekistonda minglab talabgorlar 14 ta hududdagi Prezident maktablariga kirish uchun bellashadilar.
Bu yilgi imtihonlarning 1-bosqichi uchun 8 ta turli xil variantlardagi savollar ishlab chiqildi. Bunda savollarning takrorlanmasligi va har smenada har xil savollardan foydalangan holda shaffoflikni ta’minlashga intildik.
Murojaatchilar bizdan bu yilgi Prezident maktablari qabul imtihonlariga bizning ishtirokimiz yo‘qligi haqidagi xabarlarga oydinlik kiritishimizni so‘rashdi. Bu xabarlar asossiz! Shuni ishontirib aytamanki, biz 2019-yildan beri jumladan bu yil ham Prezident maktablari qabul imtihonlarida qatnashmoqdamiz.
Bizning tashkilotimiz qabul imtihonlari bilan bog‘liq hamkorlikdan mamnun va ishonamanki, O‘zbekiston bilan hamkorligimiz uzoq yillar davom etadi”, — deydi mutaxassis.
15-iyul kuni bo‘lib o‘tgan Prezident maktablariga kirish imtihonlarining birinchi bosqichida 1-smenada tushgan savollarning 2-smenada ham takrorlangani haqida xabarlar tarqaldi. Ixtisoslashtirilgan ta’lim muassasalari agentligi buni rad etib chiqdi. “Bir smenada berilgan savollar keyingi smenalarda aynan qo‘llanilmaydi”, — deyiladi munosabatda.
Ixtisoslashtirilgan maktablar haqida
2022-yil 14-aprel kuni prezidentning “Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida”gi farmoni imzolangan. Unga ko‘ra, 2023-yil 1-iyunga qadar faoliyati tugatilgan Mehribonlik uylari va Bolalar shaharchalari negizida 5 ta ixtisoslashtirilgan maktab-internati hamda 3 ta ixtisoslashtirilgan maktabi; 2022—2024-yillarda Prezident ta’lim muassasalar agentligi tizimida 25 ta ixtisoslashtirilgan maktab-internatlari qurish hamda kelgusida yangi ixtisoslashtirilgan maktab-internatlar va ixtisoslashtirilgan maktablarni faqat agentlik tizimida tashkil etish kabi vazifalar belgilab berilgan.
Izoh (0)