Rossiya Federal xavfsizlik xizmati Qrim ko‘prigidagi portlash yuzasidan qo‘zg‘atilgan jinoiy ish doirasida besh nafar rossiyalik, uch nafar ukrainalik va armanistonlik fuqarolar qo‘lga olinganini ma’lum qildi. Ular jinoyatni tayyorlashda ishtirok etganlikda gumonlanmoqda, deb yozadi Meduza.
“FXX va Rossiya Tergov qo‘mitasi Qrim ko‘prigidagi terakt tashkilotchisi Ukraina Mudofaa vazirligining Bosh razvedka boshqarmasi, uning boshlig‘i Kirill Budanov, xodimlari va agentlari bo‘lganini aniqladi”, — deyiladi Rossiya razvedka xizmati xabarida.
Idoraning qo‘shimcha qilishicha, tergovchilar hodisaga aloqadorlikda gumonlangan 12 kishini aniqlagan.
Tergov xulosasiga ko‘ra, ko‘prikda yonib ketgan portlovchi qurilma umumiy og‘irligi 22 770 kilogramm bo‘lgan 22 dona yashiklar orasida qurilish polietilen plyonkasi bilan o‘ralgan rulonlarda bekitib qo‘yilgan. FXX ma’lumotlariga ko‘ra, bomba avgust oyi boshida Odessadan Bolgariyaga, u yerdan Armaniston, Gruziya va keyin Rossiyaga yuborilgan.
8-oktabr kuni ertalab Qrim ko‘prigida yuk mashinasi portlab ketdi. Oqibatda ko‘prikning avtomobillar yuradigan qismida bir nechta tayanchlar oralig‘i qulab tushdi, shuningdek, ko‘prikdagi temiryo‘l orqali ketayotgan sisternali tarkib yonib ketdi. Yong‘in oqibatida bir kilometrdan ortiq temiryo‘l (ko‘prik uzunligi taxminan 19 kilometr) zarar ko‘rgan. So‘nggi ma’lumotlarga ko‘ra, to‘rt kishi halok bo‘lgan.
Izoh (0)