“Tolibon” tomonidan tuzilgan Afg‘oniston hukumati Rossiyadan afg‘on fuqarolari va tadbirkorlariga viza berishni soddalashtirishni so‘radi. Bu haqda TOLOnews telekanali xabar berdi.
Qayd etilishicha, bu so‘rov “Tolibon” tashqi ishlar vazirligi rahbari Amirxon Muttaqiy tomonidan Rossiyaning Kobuldagi elchisi Dmitriy Jirnov bilan uchrashuvda bildirilgan. Suhbat chog‘ida Afg‘oniston bo‘yicha Moskva formatida uchrashuv o‘tkazish masalasi ham muhokama qilingan.
Avvalroq Balx hokimi O‘zbekistondan Afg‘oniston fuqarolariga viza berishni osonlashtirishni so‘ragandi.
Eslatib o‘tamiz, 2021-yil bahorida AQSH qo‘shinlari va boshqa xorijiy harbiy kontingentlarni Afg‘onistondan olib chiqish boshlandi. Xorijiy kuchlarning qisqarishidan foydalangan “Tolibon” mamlakatning bir qator hududlarini nazoratiga oldi va 15-avgust kuni ular poytaxt Kobulni jangsiz egalladi.
Shu paytgacha “Tolibon” hukumatini dunyoning hech bir davlati tan olmagan, ammo ular muntazam ravishda turli xalqaro anjumanlarda qatnashadi, xorijiy hukumatlar va xalqaro tashkilotlar vakillari ular bilan muzokaralar olib borish uchun Kobulga kelib turadi.
2022-yil mart oyida Moskva “Tolibon” hukumatidan birinchi afg‘on diplomatini akkreditatsiya qildi. O‘sha yilning aprel oyida Rossiya hukumati toliblar vakilini Afg‘oniston diplomatik missiyasi rahbari sifatida tan oldi.
Izoh (0)