“Tolibon” harakatining Chegara va qabila ishlari vazirligi O‘zbekiston chegarachilari bilan uchrashdi. Bu haqda Khaama Press xabar berdi.
“Tolibon” rasmiylari o‘zbek hamkasblari bilan chegara hududlari aholisi duch kelayotgan muammolarni muhokama qilgan. Ayni vaqtda Afg‘onistonning amaldagi rasmiy vakillari terrorchi guruhlarning O‘zbekistonga qarshi Afg‘oniston tuprog‘idan foydalanishiga yo‘l qo‘ymaslikka va’da bergan.
“Tolibon” “chegara masalalari” deganda nimani nazarda tutganiga aniqlik kiritmagan, biroq 2022-yil Afg‘oniston hududidan O‘zbekistonga bir necha snaryadlar uchirilgandi.
Shanxay Hamkorlik Tashkiloti (SHHT) minglab ISHID jangarilari Afg‘onistonning shimoliy chegaralarida joylashgani, bu Markaziy Osiyo davlatlari xavfsizligiga jiddiy tahdid solishi mumkinligi haqida bir necha bor ogohlantirgan.
Afg‘onistonning amaldagi rasmiylari esa bunday daʼvolarni rad etib, ularni Afg‘onistonning qo‘shnilari bilan munosabatlariga putur yetkazishga qaratilgan tashviqot va asossiz daʼvolar deb atagan.
Izoh (0)