“Толибон” томонидан тузилган Афғонистон ҳукумати Россиядан афғон фуқаролари ва тадбиркорларига виза беришни соддалаштиришни сўради. Бу ҳақда TOLOnews телеканали хабар берди.
Қайд этилишича, бу сўров “Толибон” ташқи ишлар вазирлиги раҳбари Амирхон Муттақий томонидан Россиянинг Кобулдаги элчиси Дмитрий Жирнов билан учрашувда билдирилган. Суҳбат чоғида Афғонистон бўйича Москва форматида учрашув ўтказиш масаласи ҳам муҳокама қилинган.
Аввалроқ Балх ҳокими Ўзбекистондан Афғонистон фуқароларига виза беришни осонлаштиришни сўраганди.
Эслатиб ўтамиз, 2021 йил баҳорида АҚШ қўшинлари ва бошқа хорижий ҳарбий контингентларни Афғонистондан олиб чиқиш бошланди. Хорижий кучларнинг қисқаришидан фойдаланган “Толибон” мамлакатнинг бир қатор ҳудудларини назоратига олди ва 15 август куни улар пойтахт Кобулни жангсиз эгаллади.
Шу пайтгача “Толибон” ҳукуматини дунёнинг ҳеч бир давлати тан олмаган, аммо улар мунтазам равишда турли халқаро анжуманларда қатнашади, хорижий ҳукуматлар ва халқаро ташкилотлар вакиллари улар билан музокаралар олиб бориш учун Кобулга келиб туради.
2022 йил март ойида Москва “Толибон” ҳукуматидан биринчи афғон дипломатини аккредитация қилди. Ўша йилнинг апрель ойида Россия ҳукумати толиблар вакилини Афғонистон дипломатик миссияси раҳбари сифатида тан олди.
Изоҳ (0)