Toshkent davlat iqtisodiyot universitetining 21 yoshli talabasi Jahongir Ulug‘murodov Telegram’da o‘zbek tilidagi “Shahid bo‘lib ketsak, rozi bo‘lingiz” nomli “jihod” va “hijrat”ga daʼvat qiluvchi diniy mazmundagi nashidalarni 10 nafar aʼzosi bo‘lgan “Alhamdulillah” nomli guruhga tarqatgani uchun qamalgandi. U Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi bilan Jinoyat kodeksining 57-moddasi (yengilroq jazo tayinlash) bilan ayblanib, 3 yil muddatga ozodlikdan mahrum qilingandi.
“Daryo” muxbirining xabar berishicha, bugun, 17-iyul kuni Jinoyat ishlari bo‘yicha Toshkent viloyati sudida Oqqo‘rg‘on tuman sudining 2023-yil 8-maydagi hukmi ustidan berilgan shikoyatlariga asosan appelyatsiya tartibida ko‘rib chiqish bo‘yicha ochiq sud jarayoni yakunlangan.
Mazkur jinoyat ishi Toshkent viloyat sudining jinoyat ishlari bo‘yicha sudlov hayʼati sudyasi S.Ashirmatov raisligida hamda sudyalar H.Berdiqlichev va X.Usmonovdan iborat sud tarkibida ko‘rib chiqilgan.
Toshkent viloyat sudi jinoyat ishlari bo‘yicha sudlov hayʼati appelyatsiya instansiyasining ajrimi bilan birinchi instansiya sudining Jahongir Ulug‘murodovga nisbatan chiqarilgan hukmi o‘zgarishsiz, shikoyatlar esa qanoatlantirilmasdan qoldirilgan.
Mahkamaning tushuntirishicha, ushbu ajrim ustidan Oliy sudning Jinoyat ishlari bo‘yicha sudlov hayʼatiga kassatsiya tartibida shikoyat berilishi yoki protest bildirilishi mumkin.
Sud majlisi ochiq bo‘lsa-da, sudga raislik qiluvchi OAVga foto va videotasvirga olishga ruxsat bermagan.
Mavzuga doir:
- “Yigitning harakati to‘g‘ri malakalangan”. Toshkent viloyati IIBB yigit nashida tarqatgani uchun 3 yilga qamalgani haqida
- “Nahotki bir xatosi uchun shunchalik og‘ir jazolash to‘g‘ri bo‘lsa” — 21 yoshli talabaning diniy qo‘shiq sabab 3 yilga qamalgani eʼtirozlarga sabab bo‘ldi
- Nashida tarqatganlikda ayblangan talaba yigitning advokati murojaat bilan chiqdi
- Nashida tarqatganlikda ayblangan talaba yigit ishi bo‘yicha lingvist mutaxassis so‘roq qilindi
Izoh (0)