O‘zbekistonda rahbarlar faoliyati samaradorligini baholovchi avtomatlashtirilgan axborot tizimi ishga tushirildi. Bu haqda Davlat xizmatini rivojlantirish agentligi axborot xizmati rahbari Sevara Zokirova ma’lum qildi.
Qayd etilishicha, samaradorlik.uz axborot tizimi ayni paytda sinov tariqasida ishga tushirildi.
Shuningdek, “Davlat fuqarolik xizmati sohasida inson resurslarini boshqarish” hrm.argos.uz axborot tizimi joriy etildi. Mahallalardagi hokim yordamchilari, yoshlar yetakchilari va xotin-qizlar faollari orasidan yuqori natijalarga erishgan nomzodlarni tanlab olish bo‘yicha zaxira.argos.uz manzilida maxsus platforma ishlab chiqildi.
Davlat xizmatchilarining huquqlarini himoya qilish va ular uchun shart-sharoitlar yaratish masalasida 8 ta kompleks o‘rganish va 558 ta monitoring o‘tkazildi.
O‘rganish natijalari bo‘yicha 3828 ta qonunbuzilishlari aniqlanib, 492 ta taqdimnoma, 475 ta ogohlantirish xatlari kiritildi hamda 31 nafar aybdor shaxslarni ma’muriy javobgarlikka tortish yuzasidan vakolatli organlarga takliflar berildi.
Ko‘rilgan choralar natijasida 430 nafar xodimlarning mehnatiga haq to‘lashga oid buzilgan huquqlari tiklandi, 66 ta noqonuniy buyruqlar (ishga qabul qilish to‘g‘risidagi) bekor qilindi, 24 nafar aybdor shaxslar ma’muriy jarimaga tortildi, qonunbuzilish holatlari sabab 51 ta tanlov jarayonlari to‘xtatildi.
Izoh (0)