Farg‘ona viloyatida mashina yukxonasida odam tashigan qoidabuzar haydovchiga nisbatan chora ko‘rildi, deb xabar beradi YHXX axborot xizmati.
Ijtimoiy tarmoqlarda Cobalt rusumli transport vositasi avtomobil yukxonasida yo‘lovchilarni olib ketayotgani aks etgan video tarqaldi.
Ushbu holat Farg‘ona viloyati IIB JXX YXHB tomonidan o‘rganilib, Cobalt haydovchisi aniqlangan.
Haydovchining so‘zlariga ko‘ra, u 8-iyul kuni Namangan viloyatidan Farg‘ona shahriga kelayotganida mashinada odam ko‘payib ketib, ikki yo‘lovchini yukxonaga chiqargan. U qilgan ishidan pushaymonligini aytib, boshqa bunday qilmasligini ta’kidlagan.
Haydovchiga sodir etgan qoidabuzarligining oqibati, insonlar hayotini xavf ostiga qo‘yib, yo‘lovchilarni bunday holatda tashish mumkin emasligi tushuntirilgan. Holat bo‘yicha Ma’muriy javobgarlik to‘g‘risidagi kodeksning 128-moddasiga (Haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) asosan ma’muriy bayonnoma rasmiylashtirilgan.
Avvalroq Andijon shahrida bir nechta yigitlar yo‘lda guruh bo‘lib, ulardan ikki nafari tanasining yarmini mashina oynasidan chiqarib harakatlangani to‘g‘risida xabar berilgandi.
Izoh (0)