Фарғона вилоятида машина юкхонасида одам ташиган қоидабузар ҳайдовчига нисбатан чора кўрилди, деб хабар беради ЙҲХХ ахборот хизмати.
Ижтимоий тармоқларда Cobalt русумли транспорт воситаси автомобиль юкхонасида йўловчиларни олиб кетаётгани акс этган видео тарқалди.
Ушбу ҳолат Фарғона вилояти ИИБ ЖХХ ЙХҲБ томонидан ўрганилиб, Cobalt ҳайдовчиси аниқланган.
Ҳайдовчининг сўзларига кўра, у 8 июль куни Наманган вилоятидан Фарғона шаҳрига келаётганида машинада одам кўпайиб кетиб, икки йўловчини юкхонага чиқарган. У қилган ишидан пушаймонлигини айтиб, бошқа бундай қилмаслигини таъкидлаган.
Ҳайдовчига содир этган қоидабузарлигининг оқибати, инсонлар ҳаётини хавф остига қўйиб, йўловчиларни бундай ҳолатда ташиш мумкин эмаслиги тушунтирилган. Ҳолат бўйича Маъмурий жавобгарлик тўғрисидаги кодекснинг 128-моддасига (Ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) асосан маъмурий баённома расмийлаштирилган.
Аввалроқ Андижон шаҳрида бир нечта йигитлар йўлда гуруҳ бўлиб, улардан икки нафари танасининг ярмини машина ойнасидан чиқариб ҳаракатлангани тўғрисида хабар берилганди.
Изоҳ (0)