Buxoro shahrida transport vositalari harakatiga xalaqit bergan to‘y korteji avtomobillari vaqtinchalik jarima maydoniga joylashtirildi. Bu haqda “Yangi Davr” informatsion dasturida ma’lum qilindi.
Ijtimoiy tarmoqlarda Buxoro shahridagi magistral ko‘chalari bo‘ylab to‘y korteji tartibsiz harakatlangani tasvirlangan video tarqaldi. Unda Mercedes-Benz va Gentra rusumli avtomobillar yo‘l-harakati qoidalarini buzib, xavfli manyovrlarni amalga oshirgani tasvirlangan. Mashina ichida bo‘lgan ayrim yo‘lovchilar hatto tanasini avtomobil salonidan chiqarib, harakatlangan.
Buxoro viloyati IIBga ko‘ra, mazkur to‘y kortejida ishtirok etgan barcha avtomashinalar jarima maydoniga qo‘yilgan va ularning har biriga ma’muriy bayonnoma rasmiylashtirilgan.
2023-yilning fevral boshlarida Qashqadaryo viloyati Qarshi shahrida 5-fevral kuni to‘y korteji yo‘lning har ikkala qatnov qismini to‘sib, guruh bo‘lib harakatlangani to‘g‘risida xabar berilgandi. Ularga nisbatan Maʼmuriy javobgarlik to‘g‘risidagi kodeksning tegishli moddalariga asosan, maʼmuriy bayonnoma tuzilib, avtomashinalar vaqtinchalik saqlash maydonchasiga qo‘yilgan. 2022-yilning iyulida esa Namanganda transport vositalari harakatiga xalaqit bergan to‘y korteji avtomobillari jarima maydoniga joylashtirilgan edi.
Izoh (0)