“Қонунларни, одамларни менсимайдиган, коррупция балосига берилган ҳар қандай раҳбар билан хайрлашамиз” — Шавкат Мирзиёев

Ўзбекистоннинг сайланган президенти Шавкат Мирзиёев 14 июль куни тантанали қасамёд қилиб, ўз лавозимига киришди. Тадбирда сўзга чиққан давлат раҳбари барча бўғиндаги раҳбарларга чиройли, баландпарвоз гапига қараб эмас, фаолиятининг аниқ натижасига қараб баҳо берилишини айтди.

“Одамлар энди биздан янги амалий ишларни кутяпти. Миллионлаб инсонлар — ота-оналаримиз, опа-сингилларимиз, ўғил-қизларимиз бугун бизга умид ва ишонч билан кўз тикиб турибди. Ана шундай умид ва ишончни оқлаш, эришган ютуқларимизни янги натижалар билан мустаҳкамлаш бизнинг нафақат вазифамиз, балки инсоний бурчимизга айланиши шарт”, — деди президент.

Шавкат Мирзиёев қонун ва одамларни менсимайдиган, коррупцияга берилган ҳар қандай раҳбардан воз кечилишини айтди.

“Қонунларни, одамларни менсимайдиган, уларга қўпол муносабатда бўладиган, бюрократия ва коррупция балосига берилган ҳар қандай раҳбар билан — у вазир ёки ҳоким бўладими, бошқа масъул вазифадаги амалдор бўладими – салбий ҳаракатлари билан давлат обрўсига путур етказаётган бундай кишилар билан узил-кесил хайрлашамиз”  — деди давлат раҳбари.

Шавкат Мирзиёев уларнинг ўрнига билимли, ватан ва халқ ташвиши билан яшайдиган ёш-ёш йигит-қизлар қўйилишини айтди.

“Мана, сафимизга юртимиздаги, чет элдаги нуфузли олийгоҳларда ўқиган, йирик компанияларда ишлаган қанча-қанча салоҳиятли ёшлар кириб келмоқда. Мен уларнинг тимсолида, аввало, эртанги кунимизнинг янги раҳбарларини, ҳудуд, тармоқ ва соҳаларнинг моҳир бошқарувчиларини кўраман”, — дея қайд этди президент.