“Respublikada milliy askiya va qiziqchilik sanʼatini yanada rivojlantirish chora-tadbirlari to‘g‘risida”gi prezident qarori qabul qilindi, deb xabar beradi O‘zA.
Qarorga ko‘ra, quyidagilar tashkil etiladi:
- Yusufjon qiziq Shakarjonov nomidagi respublika askiya va qiziqchilik sanʼati markazi;
- har yili so‘z ustalari va qiziqchilar o‘rtasida “Xush kayfiyat” respublika ko‘rik-tanlovi;
- har ikki yilda bir marta “Tabassum” xalqaro kulgi festivali.
Shuningdek, har yili kamida 25 ta audiovizual asar yaratish uchun davlat buyurtmasi beriladi. Bunda eng keng ommalashgan 5 ta audiovizual asar ijodkorlari BHMning 50 baravari (16 million 650 ming so‘m) miqdorida bir martalik pul mukofoti bilan taqdirlanadi.
Davlat organlari, muassasalari va korxonalari har chorakda kamida bir marotaba o‘z xodimlarining madaniy-estetik hordiq chiqarishlari uchun ommaviy-madaniy va konsert-tomosha tadbirlarini tashkil etish amaliyoti yo‘lga qo‘yiladi.
Davlat aktivlarini boshqarish agentligi, xo‘jalik jamiyatlari muassisi bo‘lgan boshqa davlat organlari bir oy muddatda ustav fondida (kapitalida) davlat ulushi 50 foiz va undan ortiq bo‘lgan xo‘jalik jamiyatlari hamda davlat korxonalarining boshqaruv organlari yig‘ilishlarida ushbu tashkilotlar buyurtmasi asosida xodimlar va ularning oila aʼzolari uchun ommaviy-madaniy va konsert-tomosha tadbirlarini o‘tkazish vazifasini biznes-rejaga kiritish bo‘yicha tashabbus bilan chiqadi.
Madaniyat va turizm vazirligi har oyning 25-sanasiga qadar kelgusi oyda tashkil etiladigan ommaviy-madaniy va konsert-tomosha, shu jumladan, askiya va qiziqchilik tomoshalari haqida davlat boshqaruvi organlari, muassasalari, korxonalari va xo‘jalik jamiyatlarini xabardor qilib boradi.
Bundan tashqari:
- askiya va qiziqchilik sanʼati sohasida taniqli ijodkorlarning mahorat maktablari faoliyati yo‘lga qo‘yiladi;
- ushbu qarorda belgilangan tartibda o‘zining mahorat maktabini yaratgan ijodkorlar asosiy ish joyi orqali har oyda mehnatga haq to‘lash eng kam miqdorining 5 baravari (4 million 900 ming so‘m) miqdorida qo‘shimcha rag‘batlantirib boriladi;
- mahorat maktablariga ular faoliyat yuritadigan muassasa obyektlaridan tekin foydalanish huquqi berilib, ularga ushbu muassasa tomonidan alohida xona ajratiladi.
2024/2025-o‘quv yilidan Karim Zaripov nomidagi Respublika estrada va sirk kolleji hamda Farg‘ona ixtisoslashtirilgan sanʼat maktabida “Askiya va qiziqchilik sanʼati” yo‘nalishi ochiladi.
2021-yil sentabrda Shavkat Mirziyoyev Farg‘onadagi Madaniyat markazida san’at namoyandalari bilan uchrashgandi. O‘shanda davlat rahbari Zokirjon Xolmuhammad o‘g‘li Furqat, Ashurali Zohiriy, Yusufjon qiziq Shakarjonov nomini abadiylashtirish, San’atkorlar xiyobonini barpo etish, umuman, viloyatda madaniyatni rivojlantirish bo‘yicha ko‘plab fikrlarni bildirgan edi.
Izoh (0)