Navoiyda fuqarolar O‘zbekiston Qizil kitobiga kiritilgan ikki dona jayronni otgani to‘g‘risida xabar berilgandi. Bosh prokuraturaning ma’lum qilishicha, holat yuzasidan jinoyat ishi qo‘zg‘atilgan.
9-iyul kuni Navoiy viloyatida o‘tkazilgan nazorat reyd tadbiri davomida Navbahor tumani hududidan o‘tuvchi A-379 yo‘lining 3–4-kilometrida fuqaro Q.SH. boshqaruvidagi Niva to‘xtatilib tekshirilganda mashina yukxonasida 2 dona otilgan Qizil kitobga kiritilgan jayron (kiyik) borligi aniqlangan.
Holat yuzasidan tekshiruv va surishtiruv ishlari olib borilganda ushbu jayronlar Samarqand viloyati Narpay tumani “Boltali” qishlog‘ida yashovchi fuqarolarga tegishli ov qurollari yordamida noqonuniy ravishda ovlangani ma’lum bo‘lgan.
Bosh prokuraturaga ko‘ra, jayronlar brokonyerlar tomonidan vahshiylarcha otib o‘ldirilganligi bo‘yicha Navoiy viloyati prokuraturasi tomonidan Jinoyat kodeksining 202-moddasi (hayvonot yoki o‘simlik dunyosidan foydalanish tartibini buzish) bilan jinoyat ishi qo‘zg‘atilgan.
“Mazkur jinoyat ishi tegishliligi bo‘yicha viloyat IIBga yuborildi. Jinoyat ishi tergovi ustidan prokuror nazorati o‘rnatilgan”, — deyiladi xabarda.
Brakonyerlik holatlari
May boshlarida “Surxon” qo‘riqxonasidan Buxoro tog‘ qo‘yining bolasini noqonuniy olib ketgan brakonyerlar ushlangani to‘g‘risida xabar berilgandi. Iyunda esa Qoraqalpog‘istonda brakonyer Qizil kitobga kiritilgan bug‘uni ovlab, qochib ketishga uringan edi.
Izoh (0)