Qashqadaryo viloyatining Shahrisabz shahrida yashovchi 26 yoshli ayol turmush o‘rtog‘idan muntazam ravishda kaltak yeb kelgani, Rossiyada ishlovchi onasi va akasining oldiga ketayotganida eri tomonidan ushlab olinib, oyoq-qo‘li bog‘lab qo‘yilgani xabar qilingandi. Qashqadaryo viloyat IIB axborot xizmatining maʼlum qilishicha, holat yuzasidan tergovga qadar tekshiruv harakatlari olib borilmoqda.
Qayd etilishicha, mazkur holat 2021-yilning may oyida sodir bo‘lgan.
“2018-yil qonuniy nikohdan o‘tib, birga yashab kelayotgan 1992-yilda tug‘ilgan fuqaro Sh.M. va 1997-yilda tug‘ilgan fuqaro Y.S.lar o‘rtasida o‘zaro oilaviy kelishmovchiliklar sodir bo‘lgan. Ayol yuqoridagi holat bo‘yicha ilgari ichki ishlar organlariga murojaat etmagan”, — deyiladi IIB axborotida.
Qo‘shimcha qilinishicha, er-xotin Sh.M. va Y.S. 2022-yil iyun oyida ham o‘zaro janjallashgani bois, mazkur voqea Jinoyat ishlari bo‘yicha Shahrisabz tuman sudida ko‘rib chiqilgan.
“Sudning 2022-yil 26-iyul kunidagi qaroriga asosan erkak Sh.M. Maʼmuriy javobgarlik to‘g‘risidagi kodeksning 41-moddasi va 52-moddasi 2-qismida nazarda tutilgan maʼmuriy huquqbuzarliklarni sodir etgan deb topilib, unga jarima jazosi qo‘llanilgan”, — deydi masʼullar.
Hozirgi kunda tarqalgan video yuzasidan Shahrisabz shahar IIB huzuridagi Tergov bo‘linmasi tomonidan tergovga qadar surishtiruv harakatlari olib borilmoqda.
Izoh (0)