Energetika vazirligi huzuridagi Tarmoqlararo energiyani tejash jamg‘armasi va BMT Taraqqiyot dasturining O‘zbekistondagi vakolatxonasi o‘rtasida Global ekologik fondning 833 ming dollar miqdoridagi beg‘araz grant mablag‘larini jalb qilishga bag‘ishlangan marosim o‘tkazildi, deb xabar bermoqda vazirlik matbuot xizmati.
Qayd etilishicha, 10-iyul kuni bo‘lib o‘tgan tadbirda Tarmoqlararo energiyani tejash jamg‘armasi ijrochi direktori Elzod Rahmanov va BMT Taraqqiyot Dasturining O‘zbekistondagi vakolatxonasi rahbari Matilda Dimovska grant mablag‘larini jalb etish shartnomasini imzoladi.
Ushbu grant mablag‘lari yordamida kelajakda jamg‘armaning hamkor banklari tomonidan qayta tiklanuvchi energiya manbalari va energiya samarador qurilmalarni xarid qilish uchun ajratilgan “Yashil iste’mol kredit”larining 30 foizgacha qismini so‘ndirish ko‘zda tutilgan.
“Grant mablag‘lari O‘zbekistonda energiya resurslariga oshib borayotgan talabni qisman qondirish va atrof-muhitga zararli gazlarning chiqarilishini kamaytirish borasidagi yumushlarni muvaffaqiyatli hal etishda qo‘l keladi”, — deyiladi xabarda.
Shuningdek, qayta tiklanuvchi energiya manbalari qurilmalarini xarid qilishni xotin-qizlar o‘rtasida yanada qo‘llab-quvvatlash maqsadida grant mablag‘lari hisobidan ayollarga ajratilgan “Yashil iste’mol kredit”ning 37,5 foizgacha qismi qoplab berilishi ko‘zda tutilmoqda.
Izoh (0)