Saudiya Arabistonining ACWA Power kompaniyasi 2024-yil oxiridan boshlab Chirchiq shahrida yiliga 3 000 tonna “yashil” vodorod ishlab chiqaradigan zavod qurishi haqida xabar berilgan edi. Ushbu zavod qurilishi loyihasi bo‘yicha yangi kelishuvlar tuzildi.
Investitsiyalar, sanoat va savdo vazirligi matbuot xizmatining xabar qilishicha, 10-iyul kuni vazir Laziz Qudratov ACWA Power kompaniyasi boshqaruvi raisi Muhammad Abunayan bilan muzokaralar o‘tkazdi. Tomonlar kompaniyaning mamlakatimizdagi joriy loyihalari portfelini amalga oshirishning dolzarb masalalarini hamda energetika va kimyo sanoatida investitsiyaviy hamkorlikni yanada kengaytirish istiqbollarini muhokama qildi.
Alohida tartibda bir qator yangi tashabbuslar ko‘rib chiqildi. Shu tariqa, tomonlar zarur jarayonlar yakunlangani va yiliga 3 ming tonna quvvatga ega “yashil” vodorod ishlab chiqaruvchi zavod qurilishi loyihasi bo‘yicha yangi kelishuvlar tuzilganini olqishladi. Qurilish ishlari 2023-yilning kuzida boshlanishi rejalashtirilgan.
Bugungi kunda ACWA Power kompaniyasi O‘zbekistondagi investitsiya portfeli umumiy qiymati 6,8 milliard dollardan ortiq va umumiy quvvati 5,5 GVt dan ortiq bo‘lgan 8 ta loyihadan iborat. Sirdaryo viloyatida quvvati 1,5 GVt bo‘lgan bug‘-gaz elektr stansiyasini, Buxoro viloyati va Qoraqalpog‘iston Respublikasida umumiy quvvati 2,6 GVt ga teng shamol elektr stansiyalari hamda Samarqand va Toshkent viloyatlarida 1,4 GVt quvvatga ega quyosh stansiyalarini qurish bo‘yicha loyihalarni amalga oshirishning dolzarb masalalari yuzasidan fikr almashildi. Loyihalarni jadal ishga tushirishni ta‘minlash bo‘yicha amaliy chora-tadbirlar kompleksini qabul qilishga kelishildi.
Izoh (0)