O‘zbekiston tijorat banklarida dollar kursi oxirgi 15 oydagi eng yuqori ko‘rsatkichga chiqdi

O‘zbekiston tijorat banklari 12-iyuldan dollar kursini o‘rtacha 15-20 so‘mga oshirdi.

Hozirda deyarli barcha kredit muassasalarida AQSH valyutasi 11 630 so‘mdan sotilmoqda — bu kabi yuqori ko‘rsatkich oxirgi marta 2022-yil 17-martda kuzatilgan edi. Shu bilan birga, mazkur turdagi valyutalar 60-110 so‘m arzonga sotib olinmoqda.

Dollarni eng arzon Tenge Bank sotmoqda — 11 620 so‘m. “Aloqabank”, “Mikrokreditbank”, “Poytaxtbank”, “Turonbank”, Asia Alliance Bank, Garant bank, Invest Finanfce Bank, Ravnaq-bank esa eng yaxshi xarid narxlarini taklif qilyapti — 11 570 so‘m.

Kuni kecha Markaziy bank xorijiy valyutalarning o‘zbek so‘miga nisbatan 12-iyulda amalda bo‘ladigan qiymatini 18,54 so‘mga ko‘tardi — rasmiy kurs 11 574,13 so‘mni tashkil qilmoqda. 5-iyul kuni Amerika valyutasining qiymati 11 541 so‘mga chiqqandi. Spot’ning yozishicha, kursning bunday ko‘tarilishi 2022-yil 24-martda kuzatilgan. O‘shanda 2020-yil aprel oyidan beri birinchi marta dollar kursi bir kunda 100 so‘mdan ko‘proq oshgan. Banklar dollarni 11 385 so‘mdan sotishni boshlagan edi.