Samarqandda taksi haydovchisi bolani itlar hamlasidan qutqarib qolgani to‘g‘risida xabar berilgandi. Telegram’dagi “Ekologuz” kanalining yozishicha, bolaga tashlangan itlarning egasi ularni “itlar jangi”ga tayyorlab kelgan.
“Mazkur it daydi emas, uy itidir. Uning egasi it urishtirish bilan shug‘ullanadi. Egasini deb it shunaqa vahshiy bo‘p ketgan. Uyida 7-8 talab itlani jangga tayyorlab yuradigan odam ekan. Hayvonlarni odamlarning o‘zi vahshiy qilib tarbiyalaydi. Albatta, ana shundaylar kasriga hozir yana O‘zbekistonning barcha hududlarida boshpanasiz itlarni qirish boshlanadi”, — deb yozadi kanal muallifi.
Shu bilan birga, kanal muallifi ushbu itlarning egasini Jinoyat kodeksining 278-moddasi 1-qismi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoiy javobgarlikka tortish kerakligini ta’kidlagan.
Samarqand shahridagi “Yoshlar” mahalla fuqarolar yig‘ini hududida joylashgan avtoturargoh oldida ketayotgan bolaga itlar hamla qilgan, taksi haydovchisi uni qutqarib qolgandi. Holat 8-iyul kuni sodir bo‘lgan, biroq videotasvirlar kuni kecha ijtimoiy tarmoqlarda tarqaldi. Qayd etilishicha, o‘sha kuniyoq bolaga tibbiy-psixologik yordam ko‘rsatilgan va ayni paytda uning holati yaxshi.
Samarqand viloyati IIB axborot xizmati rahbarining ma’lum qilishicha, bolaga tashlangan itlarning egasiga nisbatan Maʼmuriy javobgarlik to‘g‘risidagi kodeksning 110-moddasi (it va mushuk boqish qoidalarini buzish) bilan maʼmuriy bayonnoma rasmiylashtirilgan.
Izoh (0)