Энергетика вазирлиги ҳузуридаги Тармоқлараро энергияни тежаш жамғармаси ва БМТ Тараққиёт дастурининг Ўзбекистондаги ваколатхонаси ўртасида Глобал экологик фонднинг 833 минг доллар миқдоридаги беғараз грант маблағларини жалб қилишга бағишланган маросим ўтказилди, деб хабар бермоқда вазирлик матбуот хизмати.
Қайд этилишича, 10 июль куни бўлиб ўтган тадбирда Тармоқлараро энергияни тежаш жамғармаси ижрочи директори Элзод Раҳманов ва БМТ Тараққиёт Дастурининг Ўзбекистондаги ваколатхонаси раҳбари Матилда Димовска грант маблағларини жалб этиш шартномасини имзолади.
Ушбу грант маблағлари ёрдамида келажакда жамғарманинг ҳамкор банклари томонидан қайта тикланувчи энергия манбалари ва энергия самарадор қурилмаларни харид қилиш учун ажратилган “Яшил истеъмол кредит”ларининг 30 фоизгача қисмини сўндириш кўзда тутилган.
“Грант маблағлари Ўзбекистонда энергия ресурсларига ошиб бораётган талабни қисман қондириш ва атроф-муҳитга зарарли газларнинг чиқарилишини камайтириш борасидаги юмушларни муваффақиятли ҳал этишда қўл келади”, — дейилади хабарда.
Шунингдек, қайта тикланувчи энергия манбалари қурилмаларини харид қилишни хотин-қизлар ўртасида янада қўллаб-қувватлаш мақсадида грант маблағлари ҳисобидан аёлларга ажратилган “Яшил истеъмол кредит”нинг 37,5 фоизгача қисми қоплаб берилиши кўзда тутилмоқда.
Изоҳ (0)