Davlat aktivlarini boshqarish agentligi “Davlat mulki obyektlari bilan savdo(tanlov)larni o‘tkazish jarayonlarining ochiqligi va shaffofligini ta’minlash bo‘yicha qo‘shimcha chora-tadbirlari to‘g‘risida”gi hukumati qarori loyihasini muhokamaga qo‘ydi.
Qaror bilan davlat mulki obyektlari bilan savdo(tanlov)larni o‘tkazish to‘g‘risidagi ma’lumotlarni joylashtirish portaliga joylashtiriladigan axborotlar ro‘yxati va portalga integratsiya qilinadigan vazirliklar, idoralar va boshqa tashkilotlar ro‘yxati tasdiqlanadi.
Belgilangan vazirliklar, idoralar va boshqa tashkilotlar portalga:
- davlat mulki obyektlari haqidagi ma’lumotlar (obyektning umumiy tavsifi, savdo (tanlov) o‘tkazish mexanizmi, shartlari, qiymati)ni e’lon qilishning qonunchilik hujjatlarida belgilanganidan kam bo‘lmagan muddatda, biroq obyekt bilan savdo (tanlov) o‘tkazilishidan kamida bir hafta oldin;
- davlat mulki obyektlarini savdo (tanlov) natijalari to‘g‘risidagi axborotlarni (g‘olib (xaridor, xususiy sherik) haqidagi ma’lumotlar, obyektning realizatsiya qiymati, olingan majburiyatlar), savdo (tanlov) natijasi e’lon qilingan kundan so‘ng, besh kun ichida joylashtiradi.
Shunday tartib o‘rnatiladiki, portalga davlat mulki obyektlari to‘g‘risidagi ma’lumotlarni joylashtirmasdan davlat mulki obyektlarini savdo(tanlov)larga chiqarishga va to‘g‘ridan to‘g‘ri berishga yo‘l qo‘yilmaydi.
Mart oxirlarida “Davlat aktivlarini boshqarish agentligi faoliyatini samarali tashkil etish chora-tadbirlari to‘g‘risida”gi prezident qarori qabul qilingandi. Qarorga ko‘ra, 2023-yil 1-oktabrgacha “Davlat mulki obyektlari bilan savdolarni o‘tkazish to‘g‘risidagi maʼlumotlarni joylashtirish portali” yaratiladi, unda barcha davlat mulki obyektlarini savdoga chiqarish va uning natijalari to‘g‘risidagi axborotlar joylashtiriladi hamda ushbu tizim soliq organlarining axborot tizimiga integratsiya qilinadi.
Izoh (0)