Toshkent viloyati Chirchiq shahrida 26 yoshli yigit yuqori qavatdan o‘zini tashlab yubordi. Bu haqda Bosh prokuratura matbuot kotibi xabar berdi.
Maʼlum qilinishicha, 9-iyul kuni soat 09:20 larda Qoraqalpog‘istonning Amudaryo tumanida tug‘ilib, Chirchiq shahar Konstruktorchilar dahasidagi 9-uyda ota-onasi va singlisi bilan birga yashagan 26 yoshli D.R. shu uyning 8-qavatidan o‘zini tashlab yuborgan. U olgan tan jarohati oqibatida vafot etgan.
Dastlabki maʼlumotlarga ko‘ra, marhum D.R. so‘nggi besh yil davomida oila aʼzolari bilan birgalikda Rossiyada ishlab, 2023-yilning may oyi boshida O‘zbekistonga qaytib kelgan. Shu kungacha, Bo‘stonliq tumanida oilasiga tegishli bo‘lgan dala hovlida qurilish ishlari bilan band bo‘lgan.
Bosh prokuraturaga ko‘ra, holat yuzasidan tergovga qadar tekshiruv harakatlari olib borilmoqda. “Voqea sodir bo‘lgunga qadar yigitda (marhum) ruhiy holat buzilishi kuzatilgan”, — deyiladi munosabatda.
Yuqori qavatdan tushib ketish holatlari
2022-yil iyun oyida Samarqand shahridagi ko‘p qavatli binoning balkon qismidan 1,5 yoshli qizcha yiqilib tushib, vafot etgandi. Shuningdek, Toshkentdagi ko‘p qavatli uyning 11-qavatidan 1,5 yashar bola tushib ketgani haqida xabar qilingan edi. 2022-yil dekabrda esa Rossiyaning Sankt-Peterburg shahri Petrogradskiy tumanida o‘zbekistonlik ishchi 7-qavatdan tushib ketib, vafot etgani, shu yilning aprel o‘rtalarida esa Toshkent shahri Bektemir tumanidagi 289-maktabda 11-sinf o‘quvchisi 3-qavatdan tushib ketgani to‘g‘risida xabar berilgandi.
Izoh (0)