Тармоқларда Қашқадарё вилоятининг Косон туманида ҳокимлик ходими туман Солиқ инспекцияси инспекторини пичоқлагани айтилган хабар тарқалди. Косон тумани ҳокимлиги буни рад этди.
Маълум қилинишича, туман ҳокимлигининг ҳеч бир ходими солиқ идораси ходимини пичоқлагани, тан жароҳати етказгани йўқ.
“Аслида, Косон тумани солиқ инспекцияси ходими З.Ж. ва у билан таниш фуқаролар ўртасида оилавий можаро сабаб низо келиб чиққан. Ходим тан жароҳати олиб, туман тиббиёт бирлашмасига ётқизилган. Ҳозирда ходимда туман тиббиёт бирлашмасида даво муолажалари олиб борилмоқда”, — дейилади ҳокимлик ахборотида.
“Дарё” мазкур воқеага аниқлик киритиш мақсадида вилоят ИИБ ахборот хизмати раҳбари Ирода Расулова билан ҳам боғланди.
“Мазкур ҳолат юзасидан Косон туман ИИБ тергов бўлими томонидан гумонланувчига нисбатан Жиноят кодексининг 104-модда 2-қисми (қасддан баданга оғир шикаст етказиш) билан жиноят иши қўзғатилиб, гумонланувчи қўлга олинган. Жабрланувчи айни пайтда шифохонада, шифокорлар назоратида қолмоқда”, — дейди Ирода Расулова.
Изоҳ (0)