Жиззахда қиз ва йигит ўзганинг Gentra’сини олиб қочди

Жиззах вилоятида ўзганинг Gentra автомобилини олиб қочган шахслар ушланди, деб хабар беради вилоят ИИБ ахборот хизмати.

Қайд этилишича, 8 июлга ўтар кечаси Зафаробод тумани “Бўстон” маҳалласи Шифокорлар кўчасида истиқомат қилувчи 1985 йилда туғилган фуқаронинг яшаш уйи олдида турган Gentra русумли автомобиль йўқолган.

Жабрланувчи соат 02:30 да бу ҳақда Жиззах вилояти ИИБга хабар берган. Маълум қилинишича, номаълум шахс автомобилни 23:00 дан 02:30 гача бўлган вақт оралиғида олиб қочган.

Ушбу хабар асосида вилоят ИИО ходимлари томонидан тезкор тадбирлар амалга оширилган. Олиб борилган суриштирувлар давомида машина соат 03:40 ларда Жиззах шаҳри ҳудудидан ўтган Ислом Каримов кўчасида ҳаракатланиб кетаётганида тўхтатилган.

Суриштирувлар давомида Gentra’ни жабрланувчининг бирга яшовчи жияни — 17 ёшли қиз ҳамда туманнинг “Узун” маҳалласида яшовчи 18 ёшли йигит биргаликда миниб кетгани маълум бўлган.

Июль бошларида Тошкентда ўзи ишлайдиган автомобиль ювиш шаҳобчаларининг биридан Gentra’ни олиб қочган фуқарони ушлаш учун тўппончадан ўқ узилганди.