Fransiyadagi tartibsizliklardan keyin sug‘urta kompaniyalari zarar sifatida to‘lashi kerak bo‘lgan tovon miqdori 650 million yevroni tashkil qildi, deb yozdi “TASS”.
"O‘tgan haftada topshirilgan arizalarni hisobga olgan holda, bugungi kunga qadar berilgan da’volarning umumiy qiymati 650 million yevroni tashkil etadi", deyiladi France Assureurs bayonotida.
G‘alayonlardan eng ko‘p jabr ko‘rganlar xususiy korxonalar bo‘ldi. Barcha sug‘urta hodisalarining yarmidan ko‘pi (55%) tadbirkorlar mulkiga, 35 foizi mahalliy hokimiyat organlari mulkiga to‘g‘ri keladi. Hammasi bo‘lib, namoyishchilar tomonidan 3,9 mingta obyektga zarar keltirilgan.
Fransiya tadbirkorlar harakati tomonidan e'lon qilingan raqamlar yuqoridagilardan farq qiladi. Ularning hisob-kitoblariga ko‘ra, ommaviy tartibsizliklar bir milliard yevrodan ortiq zarar keltirgan. Iqtisodiyot, moliya, sanoat va raqamli suverenitet vaziri Bruno Le Merning aytishicha, 27-iyundan beri Fransiyaning turli mintaqalarida tartibsizliklar 200 ta savdo markazi va mingdan ortiq do‘konlarni talon-toroj qilgan, vayron qilgan va yoqib yuborgan.
Fransiyadagi tartibsizliklar 27-iyun kuni Parijning Nanter chekkasida yo‘l-patrul xizmati asli jazoirlik yigitni otib o‘ldirganidan keyin boshlangan. Politsiya xodimi haydovchi uning talablarini bajarishdan bosh tortgani uchun otib tashlagan.
Tartibsizliklar vaqtida 3,6 mingdan ortiq kishi hibsga olingan. Ularning uchdan bir qismi voyaga yetmaganlar, 10 foizi esa chet elliklardir.
Izoh (0)