Франциядаги тартибсизликлардан кейин суғурта компаниялари зарар сифатида тўлаши керак бўлган товон миқдори 650 миллион еврони ташкил қилди, деб ёзди “ТАСС”.
"Ўтган ҳафтада топширилган аризаларни ҳисобга олган ҳолда, бугунги кунга қадар берилган даъволарнинг умумий қиймати 650 миллион еврони ташкил этади", дейилади France Assureurs баёнотида.
Ғалаёнлардан энг кўп жабр кўрганлар хусусий корхоналар бўлди. Барча суғурта ҳодисаларининг ярмидан кўпи (55%) тадбиркорлар мулкига, 35 фоизи маҳаллий ҳокимият органлари мулкига тўғри келади. Ҳаммаси бўлиб, намойишчилар томонидан 3,9 мингта объектга зарар келтирилган.
Франция тадбиркорлар ҳаракати томонидан эълон қилинган рақамлар юқоридагилардан фарқ қилади. Уларнинг ҳисоб-китобларига кўра, оммавий тартибсизликлар бир миллиард евродан ортиқ зарар келтирган. Иқтисодиёт, молия, саноат ва рақамли суверенитет вазири Бруно Ле Мернинг айтишича, 27 июндан бери Франциянинг турли минтақаларида тартибсизликлар 200 та савдо маркази ва мингдан ортиқ дўконларни талон-торож қилган, вайрон қилган ва ёқиб юборган.
Франциядаги тартибсизликлар 27 июнь куни Парижнинг Нантер чеккасида йўл-патрул хизмати асли жазоирлик йигитни отиб ўлдирганидан кейин бошланган. Полиция ходими ҳайдовчи унинг талабларини бажаришдан бош тортгани учун отиб ташлаган.
Тартибсизликлар вақтида 3,6 мингдан ортиқ киши ҳибсга олинган. Уларнинг учдан бир қисми вояга етмаганлар, 10 фоизи эса чет элликлардир.
Изоҳ (0)