Ukraina prezidenti Vladimir Zelenskiy Zmyeiniy orolidan mamlakat aholisiga murojaat yo‘llagan videoni e’lon qildi.
“Men (urushning) 500-kunida har bir jangchimiz ushbu g‘alaba joyidan minnatdorlik bildirmoqchiman. Qurolli kuchlarimiz, razvedkamiz, Milliy gvardiyamiz, chegarachilarimiz, Ukraina xavfsizlik xizmati, milliy politsiyamiz, aloqachilarimiz, xalqimiz. Ukraina uchun kurashayotgan barchaga rahmat aytaman”, — dedi mamlakat prezidenti.
U Ukraina uchun jon berganlarga va barcha qahramonlarga sharaf aytib, mamlakat ozodligini tilagan.
Orolga Zelenskiy bilan birga harbiy razvedka rahbari Kirill Budanov va prezident ofisi rahbari Andrey Yermak tashrif buyurgan.
Video qachon yozib olingani noma’lum. Zelenskiy 2-iyul kuni Zmyeiniy oroli joylashgan Odessa viloyatiga tashrif buyurgandi.
Rossiya keng ko‘lamli urushning birinchi kunlarida Zmyeiniy orolini egallagan. Ukraina armiyasi 2022-yilning yozida orol ustidan nazoratni qaytarib olgan.
Urushga bir yil to‘lganda Zelenskiy o‘z murojaatida Zmyeiniyni tilga oldi. O‘shanda u “orol chegarachilari va ular Rossiya harbiy kemasini quvib yuborgan yo‘nalish” ukrainaliklarning jasurligi va taslim bo‘lmagani ramzi ekanini ta’kidladi.
Izoh (0)