Зеленский урушнинг 500-кунида Змеиний оролидан украиналикларга йўллаган мурожаатни эълон қилди (видео)

Украина президенти Владимир Зеленский Змеиний оролидан мамлакат аҳолисига мурожаат йўллаган видеони эълон қилди.

“Мен (урушнинг) 500-кунида ҳар бир жангчимиз ушбу ғалаба жойидан миннатдорлик билдирмоқчиман. Қуролли кучларимиз, разведкамиз, Миллий гвардиямиз, чегарачиларимиз, Украина хавфсизлик хизмати, миллий полициямиз, алоқачиларимиз, халқимиз. Украина учун курашаётган барчага раҳмат айтаман”, — деди мамлакат президенти.

У Украина учун жон берганларга ва барча қаҳрамонларга шараф айтиб, мамлакат озодлигини тилаган.

Оролга Зеленский билан бирга ҳарбий разведка раҳбари Кирилл Буданов ва президент офиси раҳбари Андрей Ермак ташриф буюрган.

Видео қачон ёзиб олингани номаълум. Зеленский 2 июль куни Змеиний ороли жойлашган Одесса вилоятига ташриф буюрганди.

Россия кенг кўламли урушнинг биринчи кунларида Змеиний оролини эгаллаган. Украина армияси 2022 йилнинг ёзида орол устидан назоратни қайтариб олган.

Урушга бир йил тўлганда Зеленский ўз мурожаатида Змеинийни тилга олди. Ўшанда у “орол чегарачилари ва улар Россия ҳарбий кемасини қувиб юборган йўналиш” украиналикларнинг жасурлиги ва таслим бўлмагани рамзи эканини таъкидлади.