Niderlandiya bosh vaziri Mark Ryutte boshchiligidagi hukumat iste’foga chiqdi. Hukumat rahbari erta-indin qirolga rasmiy ariza bilan murojaat qilishini aytdi.
Ryutte, shuningdek, o‘zi 2006-yildan buyon boshqarib kelayotgan Ozodlik va demokratiya uchun xalq partiyasi (VVD) rahbari sifatida qolish-qolmasligini o‘ylab ko‘rishini ta’kidladi.
Avvalroq Niderlandiyada hukmron o‘ng markazchilar koalitsiyasi parchalangan edi, bunga mamlakatda qochqinlarga boshpana berish siyosati bo‘yicha kelisha olmaslik sabab bo‘lgan. Oxirgi bir necha hafta mobaynida koalitsiya Niderlandiyaga kelayotgan qochqinlar va ularning qarindoshlari oqimini qanday kamaytirishni muhokama qilmoqda, chunki ular uchun yetarli joy yo‘q.
Ryutte boshchiligidagi VVD partiyasi ayrim qochqinlar, shu jumladan urush zonasini tark etganlar uchun oilasi bilan birlashishni cheklash haqida taklif kiritgan va buni qo‘llab-quvvatlashni talab qilgan.
Noyabr oyida parlament saylovlari o‘tkazilishi kutilmoqda. Amaldagi Vazirlar Mahkamasi yangi hukumat tuzilmaguncha o‘z faoliyatini davom ettiradi.
Mark Ryutte 56 yoshda. U 2010-yil oktabr oyidan buyon Niderlandiya hukumati rahbari.
Izoh (0)