2022-yil oktabr oyida Sherozda 15 kishining hayotiga zomin bo‘lgan teraktni uyushtirganlikda ayblanib, Ikki kishi — Muhammad Ramz-Rashidi va Naim Hoshim Gatali omma oldida dorga osildi. Bu haqda Eronning Mizan Online nashri xabar berdi.
O‘lim jazosi bugun, 8-iyul tongida hujum sodir bo‘lgan Shoh Cherah maqbarasi yaqinidagi ko‘chada ijro etildi.
Mizan Online ma’lumotlariga ko‘ra, erkaklar “qurolli isyon va milliy xavfsizlikka qarshi harakatlar”da aybdor deb topilib, mart oyida o‘limga hukm qilingan. Shuningdek, sud ularni “mamlakat xavfsizligiga qarshi fitna uyushtirish”da aybdor deb topdi.
Sheroz joylashgan Fors viloyati sudyasi Kozim Musaviy mahkumlar terrorchilik harakati sodir etgan shaxslarni qurollantirish, ta’minlash va unga rahbarlik qilish bilan bevosita shug‘ullanganini ma’lum qildi. Uning so‘zlariga ko‘ra, ish bo‘yicha qolgan uch nafar ayblanuvchi ISHIDga a’zolikda ayblanib, 5, 15 va 25 yillik qamoq jazosiga hukm qilingan.
26-oktabr kuni Sherozdagi Shoh-Cherax maqbarasida otishma ro‘y berdi. Hujum natijasida 15 kishi halok bo‘ldi, yana 27 kishi yaralandi. Hujumchilardan biri yaralangan va keyinchalik kasalxonada vafot etgan.
Izoh (0)