Ukraina hali NATOga kirishga tayyor emas, ammo AQSH unga Isroilga berilgan xavfsizlik kafolatlarini berishi mumkin, dedi Qo‘shma Shtatlar prezidenti Jo Bayden CNN telekanaliga bergan intervyusida.
AQSH prezidentining so‘zlariga ko‘ra, Ukrainaning NATOga aʼzoligi masalasini ovozga qo‘yish uchun hali erta, chunki xavfsizlikdan “boshqa talablar ham bor, jumladan, demokratlashtirishga oid”.
“Ukraina hozir NATO a’zoligiga tayyor emas. Alyans aʼzolari o‘rtasida Ukrainaning NATOga qabul qilinishi borasida yakdillik yo‘q. Lekin Ukrainaga NATOga a’zo bo‘lish uchun oqilona yo‘l taklif qilish kerak”, — dedi Bayden.
Xususan, “tinchlik jarayoni” boshlanganidan keyin Qo‘shma Shtatlar Ukrainaga Isroilga o‘xshash xavfsizlik kafolatlarini berishi mumkin, dedi Amerika prezidenti.
Isroil NATO a’zosi emas, ammo Saudiya Arabistoni bilan birga AQSHning Yaqin Sharq mintaqasidagi eng yirik ittifoqchisi hisoblanadi. 1999-yilda AQSH hukumati Isroil bilan o‘zaro anglashuv memorandumini imzolagan, unga ko‘ra Isroilga har yili milliardlab dollarlik harbiy yordam ko‘rsatish majburiyatini olgan. Bundan tashqari, Isroildagi xorijiy harbiy obyektlarning barchasi AQSH bazalari hisoblanadi.
Iyun o‘rtalarida The New York Times gazetasi AQSH prezidenti yordamchilariga tayanib, Vashington Ukrainaga hamkorlikning “Isroil modeli”ni taklif qilish imkoniyatini ko‘rib chiqayotgani haqida xabar bergandi. Gazeta ma’lumotlariga ko‘ra, bu model “xavfsizlik bo‘yicha 10 yillik majburiyat”ni nazarda tutadi, ammo Kiyev oldidagi majburiyatlar “unchalik uzoq muddatli bo‘lmaydi”.
Kiyev bu maʼlumotlarning to‘g‘riligini tasdiqladi.
Izoh (0)