Президентликка номзод Шавкат Мирзиёев сирдарёлик сайловчилар билан учрашувда ҳар йили 5 минг нафар профессор-ўқитувчилар тажриба алмашиш учун хорижга юборилишини айтди.
Ушбу мақсад учун 2030 йилга қадар 50 миллион доллар йўналтириш режалаштирилмоқда.
“Шунингдек, ҳар йили 200 нафар ёш олимларимизни, кейинчалик олийгоҳларга қайтиб дарс бериш шарти билан, хорижий илмий ташкилотларда диссертасия ёқлашга жўнатамиз. Олийгоҳларнинг Илмий кенгашларига дунёнинг нуфузли олийгоҳларидан етакчи профессорларни жалб қилиш вақти келди”, – деди номзод.
Шавкат Мирзиёев профессор-ўқитувчилар шароитларини янада яхшилаш бўйича ислоҳотлар давом эттирилишини айтди.
“Масалан, бугунги кунда оддий ассистент ўқитувчининг йиллик ўртача ўқув юкламаси 1 минг соатдан ошади. Бундай кўп юклама билан ўқитувчи қачон илм қилади, қачон ўз устида ишлайди? Шу боис, профессор-ўқитувчиларнинг ўқув юкламаси 25 фоизга қисқартирилади ва уларнинг илмий фаолият билан шуғулланиши учун қўшимча шароитлар яратилади. Энг муҳими, бунда уларнинг иш ҳақи камайтирилмайди.
Ўз йўналиши бўйича халқаро тан олинган касбий сертификатларга эга бўлган ўқитувчиларга қўшимча устамалар белгиланади. Шунингдек, бундай сертификати бор амалиётчиларга дарс бериш учун магистрлик дипломи талаб этилмайди”, – деди номзод.
Мирзиёев ҳудудларда қурилаётган уйларнинг 25-30 фоизи профессор-ўқитувчиларга имтиёзли шартларда берилишини айтди.
Шунингдек, номзод яна бир таклифни ўртага ташлади.
“Яна бир таклифим бор. Олийгоҳларда узоқ йиллар ишлаб, илмий мактаблар яратган профессор-ўқитувчилар номини шу даргоҳдаги кафедра, лаборатория, кутубхона, аудитория ва ўқув биноларига бериш амалиётини жорий қилсак, нима дейсизлар?”, — деди номзод.
Изоҳ (0)