Samarqand viloyati Kattaqo‘rg‘on tumanida diniy aqidaparastlik g‘oyalari bilan yo‘g‘rilgan maʼruzalarni tarqatgan bloger yigitga hukm o‘qildi, deb xabar beradi IIV axborot xizmati.
Qayd etilishicha, bloger yigit Instagram’da o‘zi profil ochib, 2022-yilning 13-may kuni diniy aqidaparastlik g‘oyalari bilan yo‘g‘rilgan maʼruzalarni tarqatgan. Taqiqlangan videorolikda Abu-Salohning jang maydonida ekani, u yerda musulmonlar qatl qilinayotgani, qamoqxonalarda muslimalar xo‘rlanayotgani va shu kabi zulm bo‘layotgan davrda turli keraksiz maslahatlar haqida tortishib yurish lozim emasligi, jihodga shoshilish kerakligi haqida so‘z boradi.
Bundan tashqari, ayblanuvchi 2022-yilning sentabr oyida Rossiyada ham bir qancha tanishlariga diniy mazmundagi maʼruzalarni Telegram orqali yuborgani ma’lum bo‘lgan.
Mazkur holat yuzasidan jinoyat ishi jinoyat ishlari bo‘yicha Kattaqo‘rg‘on tuman sudida ko‘rib chiqilgan. Yigitning yoshligi inobatga olinib, unga insonparvarlik tamoyili asosida hukm o‘qilgan.
Sud jarayonida 20 yoshli yigit o‘zining Instagram, Telegram profillariga qo‘ygan nashidalarini asl maʼnosini tushunmaganini izohlab, faqatgina obunachi yig‘ish maqsadida ommaning eʼtiborini tortmoqchi bo‘lganini bildirgan.
“Agar bu darajada bo‘lib ketishini bilganimda qo‘ymas edim. Ko‘proq ota-onamni, qarindoshlarimni o‘ylayman”, — deydi ayblanuvchi.
Sud hukmiga ko‘ra, sudlanuvchi Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandida nazarda tutilgan jinoyatni sodir etganlikda aybli deb topilib, Jinoyat kodeksining 57-moddasini qo‘llab, unga 3 yilga ozodlikdan mahrum qilish jazosi tayinlandi.
Diniy mazmundagi materiallarni tarqatish
Bundan oldin O‘zbekiston musulmonlari idorasi ijtimoiy tarmoqlarda “juma tabrigi”, “Qurʼoni karim oyatlari”, “Payg‘ambar alayhissalom hadislari”, yurtimiz ulamolari va imom-domlalarining ma’vizalarini tarqatish go‘yoki mumkin emas ekani aytilayotgan asossiz xabarlarga munosabat bildirgandi.
Diniy idora buzg‘unchi oqimlar g‘oyalarini o‘ziga jalb etuvchi musiqiy ohang, fotosurat yoki ramzlar orqali zimdan tarqatishga urinayotganini eslatib o‘tgan. Shuning uchun ham ekstremistik g‘oyalarni har qanday shaklda xoh juma tabrigi bo‘lsin, xoh boshqacha atribut yoki surat shaklida bo‘lsin, ularni tarqatish, saqlash va foydalanish qonunan taʼqiqlanadi. Avvalroq tarqatish taqiqlangan ekstremistik sayt va tarmoqlar ro‘yxati eʼlon qilingan edi. Iyun boshlarida internet orqali aqidaparastlik g‘oyalari bilan yo‘g‘rilgan materiallar tarqatgan qashqadaryolik yigit 6 yilga ozodlikdan mahrum etilgandi.
Izoh (0)