O‘zbekiston prezidenti saylovida muddatidan oldin ovoz berish jarayoni yakunlandi, deb xabar beradi “Dunyo” agentligi. Muddatidan oldin ovoz berish jarayonlari 28-iyun–5-iyul kunlari bo‘lib o‘tdi.
Markaziy saylov komissiyasi maʼlumotiga ko‘ra, 1-iyul holatida muddatidan oldin ovoz berish imkoniyatidan 376 623 kishi foydalangan. Ulardan 101 031 nafari xorijda ovoz bergan.
Muddatidan oldin ovoz berish uchun 10 784 ta, shu jumladan, O‘zbekistonning 39 ta chet davlatlardagi diplomatik va boshqa vakolatxonalari huzurida 56 ta saylov uchastkalari tashkil etildi.
Bugungi kunga qadar 152 mingdan ortiq o‘zbekistonlik prezident saylovi bo‘yicha xorijiy davlatlarda tuzilgan saylov uchastkalari manzillari ko‘rsatilgan interaktiv xaritadan foydalangan.
Muddatidan ilgari O‘zbekiston prezidenti saylovi
“O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun 6-may kuni prezident tomonidan imzolandi. Saylov kodeksiga kiritilgan o‘zgartirishlarga ko‘ra prezident muddatidan ilgari O‘zbekiston prezidenti saylovini tayinlagan taqdirda, saylov ushbu kodeksga to‘liq muvofiq holda 2 oy ichida o‘tkaziladi. Bunda saylovga tayyorgarlik ko‘rish hamda uni o‘tkazishga doir tadbirlarni amalga oshirish muddatlari Markaziy saylov komissiyasi tomonidan belgilanadi.
Prezidentlikka nomzodlarning saylovoldi tashviqoti 7-iyundan boshlandi. O‘zbekiston prezidenti saylovida ishtirok etayotgan har bir nomzodga targ‘ibot tadbirlari uchun 4 milliard 914 million so‘m ajratilgan.
Izoh (0)