Ўзбекистон президенти сайловида муддатидан олдин овоз бериш жараёни якунланди, деб хабар беради “Дунё” агентлиги. Муддатидан олдин овоз бериш жараёнлари 28 июнь–5 июль кунлари бўлиб ўтди.
Марказий сайлов комиссияси маълумотига кўра, 1 июль ҳолатида муддатидан олдин овоз бериш имкониятидан 376 623 киши фойдаланган. Улардан 101 031 нафари хорижда овоз берган.
Муддатидан олдин овоз бериш учун 10 784 та, шу жумладан, Ўзбекистоннинг 39 та чет давлатлардаги дипломатик ва бошқа ваколатхоналари ҳузурида 56 та сайлов участкалари ташкил этилди.
Бугунги кунга қадар 152 мингдан ортиқ ўзбекистонлик президент сайлови бўйича хорижий давлатларда тузилган сайлов участкалари манзиллари кўрсатилган интерактив харитадан фойдаланган.
Муддатидан илгари Ўзбекистон президенти сайлови
“Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун 6 май куни президент томонидан имзоланди. Сайлов кодексига киритилган ўзгартиришларга кўра президент муддатидан илгари Ўзбекистон президенти сайловини тайинлаган тақдирда, сайлов ушбу кодексга тўлиқ мувофиқ ҳолда 2 ой ичида ўтказилади. Бунда сайловга тайёргарлик кўриш ҳамда уни ўтказишга доир тадбирларни амалга ошириш муддатлари Марказий сайлов комиссияси томонидан белгиланади.
Президентликка номзодларнинг сайловолди ташвиқоти 7 июндан бошланди. Ўзбекистон президенти сайловида иштирок этаётган ҳар бир номзодга тарғибот тадбирлари учун 4 миллиард 914 миллион сўм ажратилган.
Изоҳ (0)