Xorazm viloyati Urganch shahri hokimi lavozimida ishlagan Shuhrat Abdullayev 3 yil muddatga ozodlikdan mahrum etildi. Bu haqda Oliy sud matbuot kotibi xabar berdi.
Qayd etilishicha, 4-iyul kuni jinoyat ishlari bo‘yicha Xiva tuman sudida sudlanuvchi Shuhrat Abdullayevga (1967-yilda Xorazm viloyatida tug‘ilgan, muqaddam sudlanmagan, 2018—2020-yillar mobaynida Urganch shahar hokimi lavozimida ishlagan) oid jinoyat ishini ko‘rib chiqish bo‘yicha ochiq sud jarayoni tugab, sud hukmi eʼlon qilingan.
Eʼlon qilingan sud hukmiga ko‘ra, Abdullayev Jinoyat kodeksining 209-moddasi (mansab soxtakorligi) 2-qismi “a” bandi va 229-4-moddasi (yer berish tartibini buzish) 2-qismi “a”, “b” bandlarida nazarda tutilgan jinoyatlarni sodir etganlikda aybli deb topilib, unga 2 yilga muayyan huquqdan, yaʼni davlat organi, davlat ishtirokidagi tashkilot va fuqarolarning o‘zini o‘zi boshqarish organlarida mansabdor va moddiy javobgar shaxs lavozimlarida ishlash huquqidan mahrum qilgan holda 3 yil muddatga ozodlikdan mahrum qilish jazosi tayinlangan.
Ushbu qarordan norozi taraflar qonunda belgilangan tartib va muddatda Xorazm viloyat sudining apellyatsiya instansiyasiga shikoyat berish va protest bildirishga haqliligi maʼlum qilinadi.
2018-yil dekabrda Xalq deputatlari Urganch shahar kengashining navbatdan tashqari sessiyasida viloyat hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari vazifasini bajaruvchi Shuhrat Abdullayev Urganch shahar hokimi etib tayinlangandi. Oradan ikki yil o‘tib, u lavozimdan olingan va Xorazm viloyatining Bog‘ot tumani hokimi lavozimida ishlab kelayotgan Oybek Xolboyev Urganch shahar hokimi etib tayinlangan.
Izoh (0)