Turkiya prezidenti Rajab Toyib Erdo‘g‘on Fransiya prezidenti Emmanuel Makron bilan telefon orqali suhbatda Ukraina va Rossiya o‘rtasida tinchlik o‘rnatish bo‘yicha har qanday tashabbusni amalga oshirishga tayyorligini ma’lum qildi. Bu haqda Turkiya rahbari devonxonasi xabar berdi.
Ta’kidlanishicha, suhbat Makronning tashabbusi bilan o‘tkazilgan.
Muzokaralar davomida ikki davlat rahbarlari Turkiya va Fransiya o‘rtasidagi ikki tomonlama munosabatlar, Rossiya va Ukraina o‘rtasidagi tinchlik jarayoni, shuningdek, G‘azo sektoridagi vaziyat ham qo‘shilgan holda ko‘plab mintaqaviy va global voqealarni muhokama qildilar.
“Prezident Erdo‘g‘on Makronga Turkiyaning adolatli tinchlik o‘rnatish orqali Ukraina-Rossiya mojarosini bartaraf etish bo‘yicha sa’y-harakatlari davom etayotganini va Alyaska hamda Vashingtondagi aloqalarni sinchkovlik bilan kuzatib borayotganini aytgan. Shuningdek, Turkiya rahbari Anqaraning Moskva va Kiyev o‘rtasidagi tinchlik muzokaralari doirasidagi har qanday sa’y-harakatlarni qo‘llab-quvvatlashga tayyor ekanligini ta’kidladi”, deyiladi xabarda.
18-avgust kuni Oq uyda AQSH va Ukraina prezidentlari Donald Tramp va Vladimir Zelenskiyning uchrashuvi bo‘lib o‘tdi. Undan so‘ng Tramp Yevropa yetakchilarini qabul qildi. Uchrashuv Trampning Alyaskada Rossiya prezidenti Vladimir Putin bilan muzokaralaridan bir necha kun o‘tgach sodir bo‘ldi. Oq uy rahbari Kiyev va Yevropa bilan Ukrainadagi mojaroni hal qilish yo‘llarini, shuningdek, AQSH-Rossiya-Ukraina uch tomonlama sammitini o‘tkazish imkoniyatini muhokama qildi. Keyinchalik Tramp vositachiligida Putin va Zelenskiy uchrashuvi tashkil etilishi kutilmoqda.
Bundan avval Ukraina prezidenti Vladimir Zelenskiy Rossiya rahbari Vladimir Putin bilan muzokaralarni Avstriya, Shveysariya yoki Turkiyada o‘tkazishga rozi ekanini bildirdi.
Izoh (0)