Toshkent va Namangan viloyatlarida somonpoya qoldiqlari yoqib yuborilgani aniqlandi.
Ekologiya, atrof-muhitni muhofaza qilish va iqlim o’zgarishi vazirligi Toshkent viloyati boshqarmasi matbuot xizmatiga ko‘ra, 5-iyun kuni Piskent tumani “Chimqo‘rg‘on” MFY hududida joylashgan “Uchqun agrobiznes” fermer xo’jaligiga tegishli 9,2 gektar yer maydonining g‘alladan bo‘shagan qismida somonpoya qoldiqlari yoqib yuborilgan.
Soha vakillari tomonidan holat yuzasidan tabiatga yetkazilgan zarar hisob-kitob qilinganda 17 million 433 ming soʼmni tashkil etgan. Hozirda aniqlangan holat bo‘yicha soha xodimlari tomonidan sud organiga tegishli hujjatlar rasmiylashtirilmoqda.
Shuningdek, Namangan tuman ekologiya, atrof-muhitni muhofaza qilish va iqlim o‘zgarishi bo‘limi xodimlari tomonidan shu kuni o‘tkazilgan reyd davomida tumanning “Ravnaq” MFY hududida fuqaro I.O. tomonidan takroriy ekin ekish maqsadida somon qoldiqlarini yoqib yuborgani aniqlangan. Buning natijasida ikki fermer xo‘jaligining 1 gektar g‘alladan bo‘shagan yer maydonidagi somon qoldiqlari yonib zararlangan.
Holat yuzasidan fuqaro I.O.ga nisbatan Ma’muriy javobgarlik to‘g‘risidagi kodeksning 88-moddasi 3-qismiga asosan 990 ming so‘m jarima hamda 4 million 669 ming 80 so‘m miqdorida tuproqqa yetkazilgan zarar hisoblangan.
Izoh (0)