Президент Шавкат Мирзиёев 3 июль куни “Тошкент шаҳри Чилонзор туманининг саноат салоҳияти ва инвестиция жозибадорлигини оширишга доир қўшимча чора-тадбирлар тўғрисида”ги қарорни имзолади. “Дарё” қонун ҳужжатини ўрганиб, яқин икки йил ичида ушбу ҳудудда қандай ўзгаришлар бўлиши кутилаётгани таҳлил қилади.
320 гектарли “Индустриал ҳудуд”
Чилонзор туманидаги “Бешқўрғон” ва “Тирсакобод” маҳаллалари ҳудудида жойлашган 320 гектар майдонда 30 йил муддатга кичик саноат зонаси мақомидаги “Индустриал ҳудуд” ташкил этилади. Уни ривожлантиришнинг асосий йўналишлари қуйидагилар бўлади:
- ҳудуднинг саноат салоҳиятини ошириш, юқори технологияларга асосланган ишлаб чиқаришларни ташкил этиш;
- юқори қўшилган қийматга эга маҳсулотларни ишлаб чиқариш учун тўғридан-тўғри инвестициялар жалб қилиш;
- энергия тежамкор, экологик хавфсиз ишлаб чиқариш қувватларини барпо этиш;
- ҳудудда транспорт, муҳандислик, йўл инфратузилмасини ривожлантириш орқали тадбиркорлик субъектлари лойиҳаларини амалга оширишга кўмаклашиш;
- корхоналарда “амалий мономарказлар” ташкил этиш орқали тадбиркорлик субъектлари учун малакали мутахассислар тайёрлаш тизимини йўлга қўйиш.
200 миллион долларлик меҳмонхона
“Бунёдкор” стадиони автотураргоҳининг жами 5,5 гектар ер участкасида қиймати камида 200 миллион доллар бўлган меҳмонхона, савдо ва хизмат кўрсатиш объектлари, кўп квартирали уйлар ва кўп қаватли автотураргоҳни ўз ичига олган замонавий ишбилармонлик маркази қурилади.
Вазирлар Маҳкамаси ва Тошкент шаҳар ҳокимлиги 2023 йил якунига қадар замонавий ишбилармонлик марказини қуриш лойиҳасини амалга ошириш учун ер участкаларини лойиҳа ташаббускорларига ўрнатилган тартибда ажратиб беради.
Коллеж майдонида “амалий мономарказ”
Икки ой муддатда “Диёр” маҳалласидаги Тошкент ходимларни бошқариш ва меҳнатни муҳофаза қилиш коллежи биносининг бўш турган майдонлари ёшлар ва хотин-қизларни замонавий касбларга ўқитиш мақсадида “амалий мономарказ” ташкил қилиш учун ижара ставкасининг минимал миқдори бўйича тадбиркорлик субъектларига танлов асосида ижарага берилади.
Иккита янги трансформатор
Туманда юкламаларни тақсимлаш, янги инвестиция лойиҳаларини амалга ошириш, шу билан бирга, аҳолини узлуксиз электр энергияси билан таъминлаш мақсадида “Рубоий” нимстанциясида 1 та 40 минг кВт қувватли ҳамда “Чилонзор” нимстанциясида 1 та 25 минг кВт қувватли қўшимча янги трансформаторлар ўрнатилади.
Сайилгоҳлар ташкил этилади
Туман ҳудудидан оқиб ўтувчи “Бўрижар” каналининг икки ён атрофини ободонлаштириш орқали канал атрофида аҳоли дам олиш маскани ва спорт майдончалари, умумий овқатланиш ва савдо шохобчаларини ўз ичига олган гастрономик кўча (сайилгоҳ) ташкил этилади.
Бундан ташқари, Бунёдкор шоҳкўчаси ён қисмидан Тошкент автомобиль ҳалқа йўлигача оқиб ўтувчи 4,1 километр узунликдаги Қонқус ва Ангор каналининг Чилонзор тумани Кичик ҳалқа йўлидан Наққошлик кўчасигача оқиб ўтувчи 1,7 километр узунликдаги қисми ободонлаштирилади ва сайилгоҳ ташкил этилади.
Шунингдек, Чилонзор тумани маҳаллалари ҳудудидаги 10 сотихдан кам бўлмаган бўш ер майдонларида кичик боғлар ва сайилгоҳлар ташкил этилади.
Chilonzor City
Замонавий турар жой мажмуаларидан иборат Chilonzor City лойиҳасини амалга ошириш бўйича ер майдонлари чегараларига аниқлик киритилиб, аниқ ҳисоб-китоблар асосида Вазирлар Маҳкамасига таклиф кирилади.
Янги йўл ўтказгич
Бунёдкор шоҳ кўчаси ва 2-Қатортол кўчалари кесишган чорраҳада мунтазам вужудга келаётган тирбандликни инобатга олган ҳолда, ушбу чорраҳада замонавий йўл ўтказгич қуриш лойиҳаси амалга оширилади.
Изоҳ (0)