MAGATE Xalqaro atom energiyasi agentligi xodimlari Zaporojye atom elektr stansiyasidagi (ZAES) so‘nggi tekshiruvlar chog‘ida stansiyaning minalanishi bilan bog‘liq hech qanday belgilarni topmadi. Bu haqda 5-iyul kuni tashkilot bosh direktori Rafael Grossi Yaponiyada jurnalistlar bilan suhbatda ma’lum qildi.
“Oxirgi tekshiruvlarimiz davomida (ZAESda) hech qanday minalash belgilarini aniqlamadik, ammo hushyorlikni saqlashda davom etamiz”, — dedi Grossi.
U, shuningdek, “harbiy harakatlar AESga juda yaqin joyda kechayotganini, shu munosabat bilan MAGATE xodimlari vaziyat haqida doimiy ravishda xabar berishini” aytdi.
Grossining so‘zlariga ko‘ra, MAGATE xodimlari ZAES hududidagi yana bir nechta joylarga kirish uchun ruxsat so‘ragan.
“MAGATE ekspertlari qo‘shimcha joylarga kirishga ruxsat so‘rab, murojaat qildi. Bu maydonda mina yoki portlovchi moddalar yo‘qligiga ishonch hosil qilish uchun zarur”, — dedi u. “Xususan, 3 va 4-reaktorlar ustidagi tomga, trubinalar zaliga va AES sovitish tizimining ayrim qismlariga kirish kerak”.
5-iyul kuni Rossiya prezidenti matbuot kotibi Dmitriy Peskov ZAES atrofida vaziyat ancha tarangligini, Ukraina hukumati tomonidan yirik sabotaj tahdidi mavjudligini aytgandi.
Iyun oxirlarida esa Ukraina prezidenti Vladimir Zelenskiy Moskvani Zaporojye AESda terakt tayyorlashda ayblagan.
Izoh (0)