Italiyaning sobiq bosh vaziri Silvio Berluskoni o‘zining so‘nggi ma’shuqasiga, Marta Fashinaga 100 million yevrolik meros qoldirdi.
Berluskoni 12-iyun kuni vafot etdi, u 86 yoshda edi. Aprel oyida kasalxonaga yotqizilganida, shifokorlar uning leykemiya bilan kasallanganini xabar qilgan. Siyosatchi vafotidan keyin Forbes jurnali Berluskoni boyligi 7,1 milliard dollar ekanini aniqladi. Boylikning asosiy qismi oilaviy xoldingga to‘g‘ri keladi.
Avvalroq Italiya OAV Berluskoni ulushining uchdan ikki qismini besh bolaga teng taqsimlashi mumkinligini yozgan edi. Shu bilan birga, vasiyatnomaga ko‘ra, uni birinchi rafiqasi Karla Elvira Lucia Dall’Olyiodan tug‘ilgan ikki katta farzandi Persilvio va Marina xoldingning 53 foiz ulushini oladi.
“Vasiyatdan ko‘rinib turibdiki, Berluskoni kabi hech kim xolding ustidan yagona nazoratga ega bo‘lmaydi”, — deyiladi kompaniya bayonotida.
Berluskonining so‘nggi ma'shuqasi deputat Marta Fashina 100 million yevro meros oladi. Xuddi shunday summa sobiq bosh vazirning ukasi Paologa ham tegadi. 30 million yevro esa Berluskonining uzoq yillik hamkori bo‘lgan biznesmen Marcello Dell’Utriga tegishli, deb xabar berdi ANSA agentligi.
O‘tgan bahorda Berluskoni Fashina bilan ramziy to‘y o‘tkazgan edi. Siyosatchi kasalxonaga yotqizilganidan keyin 33 yoshli ayol kasalxonada u bilan 1,5 oy birga bo‘ldi.
Izoh (0)